ອິນໂດເນເຊຍ ບັນລຸຂໍ້ຕົກລົງຈັດຊື້ ຍົນສູ້ຮົບ Kaan ຈຳນວນ 48 ລຳ
ຍົນສູ້ຮົບ Kaan
ເວັບໄຊຂ່າວການທະຫານອຸດສະຫະກຳປ້ອງກັນຊາດເອີຣົບ (Defence Industry Europe) ລາຍງານລະບຸໃຫ້ຮູ້ວ່າ: ຕວກກີ ແລະ ອິນ
ໂດເນເຊຍ ໄດ້ບັນລຸຂໍ້ຕົກລົງຈັດຊື້ຍົນບິນສູ້ຮົບ Kaan ຈຳນວນ 48 ລຳເປັນຂໍ້ຕົກລົງສົ່ງອອກຄັ້ງທຳອິດສຳລັບຍົນບິນສູ້ຮົບຂອງຕວກກີທີ່ພັດທະນາ
ຢູ່ພາຍໃນປະເທດ. ຂໍ້ຕົກລົງຄັ້ງນີ້ໄດ້ຮັບການລົງນາມໃນພິທີເປີດງານວາງສະແດງອຸດສາຫະກຳປ້ອງກັນຊາດສາກົນ International Defense
Industry Fair (IDEF) 2025 ທີ່ນະຄອນ ອິດສະຕັນບູ ປະເທດ ຕວກກີ.
ຕາມສື່ມວນຊົນຂອງຕວກກີລາຍງານວ່າ, ສັນຍາດັ່ງກ່າວມີມູນຄ່າປະມານ 10 ຕື້ໂດລາລວມເອົາການຜະລິດແລະການຈັດສົ່ງເຮືອບິນໃນໄລຍະ
10 ປີ. ຂໍ້ຕົກລົງນີ້ຍັງລວມມີແຜນການສ້າງຕັ້ງໂຮງງານແຫ່ງໃໝ່ຢູ່ ອິນໂດເນເຊຍ ເພື່ອສະໜັບສະໜູນການຜະລິດພາຍໃນປະເທດຕວກກີ Turkish
Aerospace Industries (TAI), ທີ່ມີສຳນັກງານຢູ່ໃນ ອິນໂດເນເຊຍ ຈະສະໜອງການຊ່ວຍເຫຼືອການຜະລິດພາຍໃນ ແລະ ການຮ່ວມມືທາງ
ດ້ານອຸດສາຫະກຳ. ຍົນລຳທີສອງ ແລະ ທີສາມທີ່ປະກອບດ້ວຍຊ່ອງເກັບອາວຸດພາຍໃນ, ລະບົບຕື່ມນ້ຳມັນເຊື້ອໄຟທາງອາກາດ ແລະ ການປັບປ່ຽນ
ໂຄງສ້າງຍົນຄາດວ່າຈະບິນທົດລອງຄັ້ງທຳອິດໃນເດືອນ ເມສາ ແລະ ເດືອນ ກໍລະກົດ 2026. ຍົນສູ້ຮົບ Kaan ຕົ້ນແບບເຫຼົ່ານີ້ຈະຊ່ວຍໃຫ້ການພັດ
ທະນາຮູບແບບເພີ່ມເຕີມກ່ອນທີ່ຈະເລີ່ມຕົ້ນຜະລິດຈຳນວນຫຼາຍ.
ມັນເປັນຍົນສູ້ຮົບລຸ້ນທີ 5 ທີ່ຕວກກີພັດທະນາມາເປັນເວລາເກືອບ 1 ທົດສະວັດ. ຍົນລຸ້ນນີ້ເປີດໂຕຄັ້ງທຳອິດໃນປີ 2023 ແລະ ສຳເລັດການ
ທົດລອງບິນຄັ້ງທຳອິດໃນຕົ້ນປີ 2024. ເຊິ່ງການຜະລິດຍົນສູ້ຮົບຈຳນວນຫຼາຍມີແຜນຈະເລີ່ມຂື້ນໃນປີ 2028. ຂໍ້ຕົກລົງກັບ ອິນໂດເນເຊຍ ຖືເປັນ
ບາດກ້າວສຳຄັນ ໃນການເຕີບໃຫຍ່ຂອງ ຕວກກີ ໃນພາກອຸດສາຫະກຳປ້ອງກັນຊາດລະດັບໂລກ.
ແຫຼ່ງທີ່ມາ: ຂກທ
ວັນທີ 04/08/2025