ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ທະຫານນະຄອນຫຼວງວຽງຈັນ ປິດບັ້ນອົບຮົມ-ຫັດແອບ ປະຈຳປີ 2022


    ວັນທີ 24 ພະຈິກ 2022 ນີ້, ກອງບັນຊາການທະຫານນະຄອນຫຼວງວຽງຈັນ ໄດ້ປິດບັ້ນອົບຮົມ-ຫັດແອບ ປະຈຳປີ 2022, ປິດຊຸດອົບຮົມກໍ່ສ້າງນາຍ ສິບທະຫານຮາບ ຊຸດທີ VII ແລະ ບຳລຸງການທະຫານ ຂັ້ນພື້ນຖານ ລະບົບ 6 ເດືອນ ຊຸດທີ I, ໂດຍການເຂົ້າຮ່ວມຂອງ ສະຫາຍ ອາດສະພັງທອງ ສີພັນ ດອນ ກຳມະການສູນກາງພັກ, ເຈົ້າຄອງນະຄອນຫຼວງວຽງຈັນ, ມີສະຫາຍ ພົນຈັດຕະວາ ສີພອນ ຈັນສົມວົງ ຮອງປະທານ ປກຊ-ປກສ ນະຄອນຫຼວງວຽງ ຈັນ, ສະຫາຍ ພົນຈັດຕະວາ ໄພວັນ ຈັນທະພົມມາ ຫົວໜ້າການເມືອງ ທະຫານນະຄອນຫຼວງວຽງຈັນ, ມີຄະນະພັກ-ຄະນະບັນຊາກອງບັນຊາການ, ຕາງໜ້າ ຈາກພາກສ່ວນຕ່າງໆເຂົ້າຮ່ວມ.

     ສະຫາຍ ພັນໂທ ຄຳສິງ ພົນປະເສີດ ຮອງຫົວໜ້າຫ້ອງເສນາທິການ ທະຫານນະຄອນຫຼວງວຽງຈັນ ໄດ້ຜ່ານບົດສະຫຼຸບຕີລາຄາຜົນໄດ້ຮັບຜ່ານການຈັດ ຕັ້ງປະຕິບັດແຜນການອົບຮົມ-ຫັດແອບປັບປຸງລະບຽບແບບແຜນ, ເຝິກຝົນກຳລັງແຮງກາຍ ປະຈຳປີ 2022 ທົ່ວກອງບັນຊາການທະຫານນະຄອນຫຼວງວຽງ ຈັນ, ແຜນການກໍ່ສ້າງນາຍສິບທະຫານຮາບ ຊຸດທີ VII ແລະ ບຳລຸງການທະຫານຂັ້ນພື້ນຖານ ລະບົບ 6 ເດືອນ ຊຸດທີ I. ຜ່ານການອົບຮົມ-ຫັດແອບຕົວຈິງ ພະນັກງານ-ນັກຮົບສາມາດກຳໄດ້ທິດສະດີຫຼັກການ, ມີຄວາມຊຳນານທາງດ້ານສິລະປະຍຸດ-ຍຸດທະວິທີ, ສາມາດຕີລາຄາຜົນໄດ້ຮັບລວມ ບັນລຸໄດ້ 81%, ອົບຮົມທະຫານໃໝ່ ບັນລຸໄດ້ 88,21%, ອົບຮົມໃຫ້ກຳລັງກອງຫຼອນ 9 ຕົວເມືອງ ບັນລຸໄດ້ 75,86%, ອົບຮົມໃຫ້ນັກຮຽນ-ນັກສຶກສາທົ່ວນະຄອນຫຼວງ ວຽງຈັນ ບັນລຸໄດ້ 75,06%, ສຳລັບບັ້ນອົບຮົມກໍ່ສ້າງນາຍສິບ ແລະ ບຳລຸງການທະຫານຂັ້ນພື້ນຖານ ຕີລາຄາການຊ້ອມຮົບປະສານສຽງແຕກ ບັນລຸໄດ້ 85%, ສອບເສັງຈົບຊັ້ນພາກການເມືອງ ບັນລຸໄດ້ 91%, ພາກລະບຽບຮູບແຖວ 92%, ພາກສິລະປະຍຸດທະຫານຮາບ 90%, ພາກຍຸດທະວິທີ 96% ແລະ ຕີລາຄາຜົນໄດ້ຮັບການສອບເສັງຈົບຊັ້ນໄດ້ຂັ້ນເກັ່ງ. ຈາກນັ້ນ, ກໍໄດ້ມອບປະກາສະນີຍະບັດໃຫ້ນັກຮຽນກໍ່ສ້າງນາຍສິບ ແລະ ບຳລຸງການທະຫານ ຂັ້ນພື້ນຖານ ຈຳນວນ 177 ສະຫາຍ ຢ່າງສົມກຽດ.

ແຫຼ່ງທີ່ມາ: ສຸລິຍາ
ວັນທີ 28/11/2022