ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ຫ້ອງການເມືອງ ກອງພົນທີ 4 ມອບເງິນນະໂຍບາຍໃຫ້ພະນັກງານພັກການຮັບບຳນານ


    ໃນວັນທີ 21 ຕຸລາ 2022 ນີ້, ຫ້ອງການເມືອງ ກອງພົນທີ 4 ໄດ້ຈັດຕັ້ງພິທີມອບເງິນນະໂຍບາຍໃຫ້ແກ່ພະນັກງານທີ່ພັກການຮັບບຳນານ, ໂດຍການ ເປັນປະທານຂອງ ສະຫາຍ ພັນເອກ ຈັນແດງ ຂຸນຍຸລາດ ຫົວໜ້າຫ້ອງການເມືອງ ກອງພົນທີ 4, ມີຄະນະພະແນກການທີ່ກ່ຽວຂ້ອງ ພ້ອມດ້ວຍພະນັກງານ ພັກການຮັບບຳນານເຂົ້າຮ່ວມ.

     ສະຫາຍ ພັນໂທ ບຸນທະວີ ແກ້ວສີລາເພັດ ຫົວໜ້າພະແນກນະໂຍບາຍ ກອງພົນທີ 4 ໄດ້ຜ່ານຂໍ້ຕົກລົງວ່າດ້ວຍການອະນຸມັດໃຫ້ນາຍທະຫານພັກການ ຮັບບຳນານ ຢູ່ກອງພົນທີ 4 ປີ 2022. ໂດຍອີງຕາມກົດໝາຍ ວ່າດ້ວຍປະກັນສັງຄົມ (ສະບັບປັງປຸງ), ອີງຕາມກົດໝາຍວ່າດ້ວຍນາຍທະຫານກອງທັບ ປະ ຊາຊົນລາວ (ສະບັບປັບປຸງ), ໝວດທີ I ມາດຕາ 33 ແລະ 34 ເພື່ອຈັດຕັ້ງປະຕິບັດຕາມແຜນນະໂຍບາຍຂອງ ພັກ-ລັດ ແລະ ກົດໝາຍນາຍທະຫານກອງ ທັບ ປະຊາຊົນລາວ ທີ່ມີຕໍ່ນາຍ ແລະ ພົນທະຫານຢູ່ໃນຖັນແຖວກອງທັບ, ຜູ້ທີ່ໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະ ເທດຊາດ ກໍຄືກົມກອງຕາມໜ້າທີ່ວຽກງານທີ່ໄດ້ຮັບການມອບໝາຍຕະຫຼອດໄລຍະທີ່ຜ່ານມາຈົນເຖິງອາຍຸກະສຽນເຂົ້າບຳນານ. ໃນນັ້ນ, ມີນາຍທະຫານ ກອງພົນທີ 4 ເຂົ້າຮັບບຳນານ ທັງໝົດ 12 ສະຫາຍ ລວມເງິນທັງໝົດ 289.918.908 ກີບ.

     ໃນໂອກາດດັ່ງກ່າວ, ສະຫາຍ ພັນເອກ ຈັນແດງ ຂຸນຍຸລາດ ໄດ້ໂອ້ລົມສະແດງຄວາມຍ້ອງຍໍຊົມເຊີຍ ແລະ ຂອບໃຈເປັນຢ່າງສູງຕໍ່ພະນັກງານບຳນານ ທີ່ເຮັດໜ້າທີ່ປະກອບສ່ວນຢ່າງສຸດກົກສຸດປາຍໃນການປະຕິບັດໜ້າທີ່ປະກອບສ່ວນເຂົ້າໃນວຽກງານລວມຂອງກອງພົນທີ 4 ກໍຄືປະກອບສ່ວນເຂົ້າໃນວຽກ ງານປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາ, ພ້ອມທັງຮຽກຮ້ອງໃຫ້ທຸກສະຫາຍສືບຕໍ່ນຳເອົາແນວທາງນະໂຍບາຍຂອງພັກ-ລັດ, ແບບແຜນການດຳລົງຊີວິດຂອງທ່ານຜູ້ນຳຮຸ່ນກ່ອນ, ດຳເນີນຊີວິດການເມືອງ ແລະ ໃຫ້ການຮ່ວມມືກັບອຳນາດການປົກຄອງຂັ້ນຕ່າງໆ, ສຶກສາອົບຮົມໃຫ້ ລູກຫຼານຂອງຕົນເປັນພົນລະເມືອງດີ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ແລະ ນຳໃຊ້ເງິນຈຳນວນດັ່ງກ່າວໄປໝູນ​ໃຊ້ໃນການພັດ ທະນາເສດຖະກິດຄອບຄົວຂອງຕົນໃຫ້ເກີດປະໂຫຍດສູງສຸດ.

ແຫຼ່ງທີ່ມາ: ບົວຄຳ ທອງລັດສະໝີ
ວັນທີ 25/10/2022