ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ຄະນະສິລະປະກອນທະຫານ​ອາກາດ ກອງທັບ​ປະຊາຊົນ​ຫວຽດນາມ
ສະແດງ​ມິດຕະພາບ ຢູ່​ແຂວງ​ຫຼວງ​ພະ​ບາງ


    ໃນ​​ວັນ​ທີ 17 ພະຈິກ 2022 ນີ້, ຄະນະ​ສິລະ​ປະກອນ​ເຫຼົ່າ​ທັບ​ປ້ອງ​ກັນ​ອາກາດ-ທະຫານ​ອາກາດ ກອງທັບ​ປະຊາຊົນ​ຫວຽດນາມ​ ນຳ​ໂດຍ ສະຫາຍ ພັນ ​ເອກ ​ພິເສດ ຟ້າມ​ແອັງ​ທົງ ຫົວໜ້າສິລະ​ປະກອນ​ເຫຼົ່າ​ທັບ​ປ້ອງ​ກັນ​ອາກາດ-ທະຫານ​ອາກາດ​ກອງ​ທັບ​ປະຊາຊົນ​ຫວຽດນາມ, ພ້ອມ​ດ້ວຍນັກສະແດງ ໄດ້​ເຄື່ອນ ​ ໄຫວ​ສະແດງມິດຕະພາບ ​ຢູ່​ກອງ​ບັນຊາການ​ທະຫານ​ແຂວງ​ຫຼວງ​ພະ​ບາງ, ມີ​ສະຫາຍ ພັນ​ເອກ ແກ້ວ​ສຸວັນ ຜາງ​ພິລາ​ວົງ ຮອງ​ຫົວໜ້າ​ກົມ​ໂຄສະນາ​ອົບຮົມ ກົມ​ໃຫຍ່​ການເມືອງ​ກອງທັບ ຮ່ວມ​ຕິດຕາມຄະນະ, ມີ​ຄະນະ​ພັກ-ຄະນະ​ບັນຊາ​ກອງ​ບັນຊາ​ການ​ທະຫານ​ແຂວງ, ຕະຫຼອດ​ຮອດ​ພະນັກງານ-ນັກຮົບ, ແຂກ​ຖືກ​ ເຊີນ ແລະ ພໍ່​ແມ່​ປະຊາຊົນ​ອ້ອມ​ຂ້າງ​ກອງ​ບັນຊາ​ການ​ເຂົ້າ​ຮ່ວມ​ຮັບ​ຊົມ.

     ກ່ອນ​ການສະແດງ, ​ສະຫາຍ ພັນ​ເອກ ​ພິເສດ ຟ້າມ​ແອັງ​ທົງ ໄດ້​ມີ​ຄຳ​ເຫັນ​ວ່າ: ການ​ມາ​ເຄື່ອນ​ໄຫວ​ສະແດງ​ມິດຕະພາບຂອງ​ຄະນະ​ສິລະ​ປະກອນ​ເຫຼົ່າ​ທັບ ​ປ້ອງກັນ​ອາກາດ-ທະຫານ​ອາກາດ​ກອງທັບ​ປະຊາຊົນ​ຫວຽດນາມ ຄັ້ງ​ນີ້, ແມ່ນ​ເພື່ອ​ເປັນ​ການ​ປະກອບສ່ວນ​ສ້າງ​ບັນຍາກາດ​ເບີກບານ​ມ່ວນຊື່ນ ເນື່ອງ​ໃນ​ໂອ ກາດ​ສະເຫຼີມສະຫຼອງ​ປີ​ສາມັກຄີ​ມິດຕະພາບ ລາວ-ຫວຽດນາມ ​ປີ 2022 ກໍ​ຄື: ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ​ ລາວ-ຫວຽດນາມ ຄົບ ຮອບ 60 ປີ ແລະ ວັນ​ເຊັນ​ສົນທິສັນຍາ ແລະ ການ​ຮ່ວມ​ມື​ຮອບດ້ານ ລາວ-ຫວຽດນາມ ຄົບຮອບ 45 ປີ ໃຫ້​ມີ​ເນື້ອ​ໃນ​ຄວາມ​ໝາຍ​ເລິກເຊິ່ງ, ທັງ​ເປັນ​ ການ​ສັນລະເສີນ​ມູນເຊື້ອ​ອັນ​ດີງາມ ແລະ ບໍລິສຸດ​ຜຸດ​ຜ່ອງ​ລະຫວ່າງ​ສອງ​ຊາດ, ຄວາມ​ງາມ​ສະເພາະ​ຂອງ​ແມ່ຍິງ​ຫວຽດນາມ ແລະ ກຳລັງ​ແຮງ​ໜຸ່ມ​ຂອງ​ນັກ ຮົບ, ເພື່ອ​ສັນລະເສີນ​ມູນເຊື້ອ​ການ​ຕິດ​ພັນ​ສະໜິດແໜ້ນ ແລະ ການ​ເຕີບ​ໃຫຍ່​ຂະຫຍາຍຕົວ​ຂອງ​ສອງ​ກອງທັບ, ປະກອບສ່ວນ​ເຂົ້າ​ໃນ​ພາລະກິດ​ປົກ​ປັກ​ຮັກ ສາ ແລະ ສ້າງສາ​ພັດທະນາ​ປະເທດ​ຊາດ, ພາຍ​ໃຕ້​ຫົວຂໍ້ “ສາຍໃຈ ​ຫວຽດ-ລາວ​ ບໍລິສຸດ​ຜຸດ​ຜ່ອງ” ລວມ​ມີ 13 ລາຍ​ການສະແດງ​ຄື: ຮ້ອງ​ປະສານ​ສຽງ​ເພັງ: ສາຍ​ນໍ້າ​ສາຍໃຈ, ຮ້ອງ​ດ່ຽວ​ຍິງ​ໃນ​ບົດ​ເພງ: ຄວາມ​ຮັກ​ອັນ​ຍິ່ງ​ໃຫຍ່​ຂອງ​ລຸງ​ໂຮ່, ຮ້ອງ​ດ່ຽວ​ຊາຍ ​ບົດເພງ: ລຸງ​ໄກສອນ​ໃນ​ດວງ​ໃຈ, ຟ້ອນ: ສີສັນ​ຫວຽດນາມ, ຮ້ອງ​ໝູ່​ຍິງ​ ໃນ​ບົດ​ເພງ: ຕາ​ທິບ, ຮ້ອງ​ຄູ່​ຍິງ-ຊາຍ ໃນ​ບົດ​ເພງ: ສາຍໃຈ ຫວຽດ-ລາວ, ບົດ​ຟ້ອນ: ເພື່ອນ​ຮ່ວມ​ອຸດົມ​ການ, ຮ້ອງ​ດ່ຽວ​ຍິງ ​ໃນ​ບົດ​ເພງ: ຈົດ ໝາຍ​ເຖິງ​ອ້າຍ, ຮ້ອງ​ໝູ່​ຊາຍ​ ໃນ​ບົດ​ເພງ: ທະຫານ​ບໍ່​ຢ້ານ​ຕໍ່​ອຸປະສັກ, ເພງ: ສາຍສຳພັນ​ທີ່​ຍິ່ງ​ໃຫຍ່ ລາວ-ຫວຽດນາມ; ຟ້ອນ: ດອກ​ໄມ້​ໄຟ​ຢູ່​ໃນ​ງານ​ບຸນ, ຮ້ອງ​ໝູ່​ຍິງ: ເຢັນ​ສະບາຍ​ຊາວນາ, ຮ້ອງ​ດ່ຽວ​ຊາຍໃນ​ບົດ​ເພງ: ຄວາມ​ຮັກ​ລະດູບານໃໝ່​ທີ່​ມີ​ສີສັນ, ຮ້ອງ​ດ່ຽວ​ຍິງ​ ໃນ​ບົດ​ເພງ: ນໍ້າໃຈ​ແມ່​ລາວ, ຮ້ອງ​ປະສານ ​ຟ້ອນ​ ໃນ​ບົດ​ເພງ: ສາຍໃຈ​ ຫວຽດ-ລາວ ແລະ ເພງ: ຮ່າໂນ້ຍ​ວຽງ​ຈັນ, ແຕ່​ລະລາຍ​ການສະແດງ​ລ້ວນ​ແຕ່​ໄດ້​ສ້າງ​ຄວາມ​ປະ​ທັບ​ໃຈ​ໃຫ້​ແກ່​ຜູ້​ຊົມ​ເປັນ​ຢ່າງ​ດີ.

ແຫຼ່ງທີ່ມາ: ແສງເດືອນ
ວັນທີ 21/11/2022