ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ຫຼາຍ​ກົມ​ກອງ​ສືບຕໍ່ປາຖະກະຖາ​ມູນເຊື້ອ 2 ວັນ​ປະຫວັດສາດ


    ໄລຍະ​ຕົ້ນ​ເດືອນ​ທັນວາ​ນີ້, ມີ​ຫຼາຍ​ກົມ​ກອງ​ສືບຕໍ່​ປາຖະກະຖາ​ເລົ່າຄືນ​ມູນເຊື້ອ​ວັນຊາດ ​ທີ 2 ທັນວາ ຄົບຮອບ 47 ປີ ແລະ ວັນ​​ເກີດ ປະທານ ໄກສອນ ພົມວິຫານ ຄົບຮອບ 102 ປີ. ໃນ​ນັ້ນ, ມີ​ກົມ​ ວິທະຍາສາດ-ປະຫວັດສາດ​ ການ​ທະຫານ, ສູນ​ເສຍ​ອົງຄະ​ພິເສດ 790, ກອງພັນ​ໃຫຍ່ 302 ກອງພົນ​ທີ 3, ໂຮງຮຽນ​ທິດ​ສະ​ດີ​ການເມືອງ​ກອງທັບ, ສະ​ຖາ​ບັນ​ອະນາໄມ​ກັນ​ພະຍາດ ແລະ ສົ່ງເສີມ​ສຸຂະພາບ​ກອງທັບ ແລະ ພະ​ແນກ​ສື່ສານ​ທະຫານ​ແຂວງ​ຫຼວງພະ​ບາງ. ຢູ່​ແຕ່​ລະ​ກົມ​ກອງ​ໄດ້​ຍົກ​ໃຫ້​ເຫັນຄວາມ​ໝາຍ​ສຳຄັນ​ມູນເຊື້ອ​ຂອງ​ວັນຊາດ ​ວັນ​ທີ 2 ທັນວາ ເຊິ່ງ​ເປັນ​ວັນ​ແຫ່ງ​ໄຊຊະນະ​ຂອງ​ການ​ຕໍ່ສູ້​ຕ້ານ​ການ​ຮຸກຮານ​ຂອງ ​ສັດຕູ​ພາຍ​ນອກ ແລະ ມູນເຊື້ອ​ສ້າງສາ​ພັດທະນາ​ປະເທດ​ຊາດ, ໂດຍ​ສືບ​ທອດ​ມູນເຊື້ອ​ອົງອາດ​ກ້າຫານ​ຂອງ​ບັນພະບູລຸດ​ລາວ, ປະຊາຊົນ​ບັນດາເຜົ່າ ​ໂດຍ​ພາຍ ​ ໃຕ້​ການ​ນຳພາ​ຂອງ​ພັກ​ປະຊາຊົນປະຕິວັດ​ລາວ ໄດ້​ສາມັກຄີ​ກັນ​ຕໍ່ສູ້​ຢ່າງ​ພິລະ​ອາດ​ຫານ, ຕ້ານ​ການ​ຮຸກ​ຮານ ແລະ ຄອບ​ຄອງ​ຂອງ​ພວກ​ຈັກກະພັດ​ລ່າເມືອງ​ຂຶ້ນ ທັງ​ແບບ​ເກົ່າ ແລະ ໃໝ່ ຈົນ​ສາມາດ​ປົດປ່ອຍປະ​ເທດ​ຊາດ​ໄດ້​ຢ່າງ​ສົມບູນ ແລະ ສະຖາປະນາ​ເປັນ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ​ຢ່າງ​ສະຫງ່າ​ ຜ່າເຜີຍ ໃນ​ວັນ​ທີ 2 ທັນວາ 1975. ຈາກ​ນັ້ນມາ​ ພັກ ແລະ ລັດຖະບານ​ລາວ ກໍ​ໄດ້​ວາງ 2 ໜ້າທີ່​ຍຸດ​ທະ​ສາດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ ຊາດ​ອອກ ເພື່ອ​ນຳພາ​ປະເທດ​ຊາດ​ກ້າວ​ສູ່​ຈຸດໝາຍ​ສັງຄົມ​ນິຍົມ ແລະ ຮຸ່ງເຮືອງ​ສີວິໄລ. ຕະຫຼອດ​ໄລຍະ 47 ປີຜ່ານມາ ​ສປປ ລາວ ສາມາດ​ປົກ​ປັກ​ຮັກສາ​ລະ ບອບ​ໃໝ່​ໄວ້​ໄດ້​ຢ່າງ​ໝັ້ນຄົງ ເຮັດ​ໃຫ້​ປະເທດ​ຊາດ​ມີ​ຄວາມສະຫງົບ, ສັງຄົມ​ມີ​ຄວາມ​ເປັນ​ລະບຽບ​ຮຽບ​ຮ້ອຍ ແລະ ເສດຖະກິດ​ມີ​ການ​ຂະຫຍາຍຕົວ​ເປັນ​ ກ້າວໆ​ມາ. ພ້ອມ​ກັນ​ນັ້ນ, ກໍ​ໄດ້​ຍົກ​ໃຫ້​ເຫັນ​ຊີວິດ​ການເຄື່ອນໄຫວ​ປະຕິວັດ, ຜົນງານ-ຄຸນງາມຄວາມດີ, ຄຸນສົມບັດ​ສິນ​ທຳ​ປະຕິວັດ, ສະຕິ​ປັນຍາ​ອັນ​ສະຫຼາດ ​ສ່ອງ​ໃສ ພ້ອມ​ທັງ​ບົດຮຽນ​ນຳພາ​ອັນ​ລໍ້າ​ຄ່າ​ຂອງ ​ປະທານ ໄກສອນ ພົມວິຫານ ຜູ້ນຳ​ທີ່​ແສນ​ເຄົາລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ, ເພື່ອ​ແນໃສ່​ ເຮັດ​ໃຫ້​ພະ ນັກງານ-ນັກຮົບ​ຮຸ່ນ​ສືບ​ທອດ​ໄດ້​ສຶກ​ສາ​ຮ່ຳຮຽນ​ເອົາ​ເປັນ​ແບບຢ່າງ​ໃນ​ການ​ເຝິກຝົນ​ຫຼໍ່​ຫຼອມ​ຕົນ​ເອງໃຫ້​ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ຄຸນສົມບັດ​ສິນ ​ທຳ​ປະຕິວັດ ແລະ ເປັນ​ຜູ້​ສືບ​ທອດ​ທີ່​ດີ​ໃນ​ອະນາຄົດ.

ແຫຼ່ງທີ່ມາ: ໜັງສືພິມກອງທັບ
ວັນທີ 20/12/2022