ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ໂຮງງານ​ປະສານ​ເຫຼົ່າ​ຫຼວງ​ພະ​ບາງ ຈັດ​​ກິດຈະກຳ​ບໍລິຈາກ​ເລືອດ​ຊ່ວຍເຫຼືອ​ສັງຄົມ


    ວັນ​ທີ 28 ພະຈິກ ຜ່ານມານີ້, ໂຮງງານ​ປະສານ​ເຫຼົ່າ​ຫຼວງ​ພະ​ບາງ ໄດ້​ຈັດ​ກິດຈະກຳ​ບໍລິຈາກ​ເລືອດ ເພື່ອ​ຊ່ວຍເຫຼືອ​ສັງຄົມ​ໂດຍ​ບໍ່​ຫວັງ​ຜົນ​ຕອບ​ແທນ, ໂດຍ​ມີ​ພະນັກງານ-ນັກຮົບ​ໃນ​ໂຮງງານ​ເຂົ້າ​ຮ່ວມ.

     ທ່ານ ນາງ ພູທອນ ສຸວັນນະ​ຈັກ ຮອງ​ຫົວໜ້າ​ສູນ​ບໍລິຈາກ​ເລືອດ​ ອົງການ​ກາແດງລາວ ສາຂາແຂວງ​ຫຼວງ​ພະ​ບາງ ໄດ້ອະທິບາຍ​ໃຫ້​ຄວາມ​ຮູ້​ເຖິງຄວາມ​ ສຳຄັນ​ຂອງ​ການ​ບໍລິຈາກເລືອດ, ​ເປັນ​ການ​ເສຍສະຫຼະ​ປະກອບສ່ວນ​ອັນ​ຍິ່ງ​ໃຫຍ່​ຕໍ່​ສັງຄົມ, ຊ່ວຍເຫຼືອ​ເພື່ອນ​ມະນຸດ​ດ້ວຍ​ກັນ​ດັ່ງ​ຄຳ​ຂວັນ​ທີ່​ວ່າ: ແບ່ງ​ຄວາມ ຮັກ, ແບ່ງ​ນ້ຳໃຈ​ໃຫ້​ເລືອດ-ໃຫ້​ຊີວິດຮ່ວມ​ບໍລິຈາກ​ເລືອດ​ຊວ່ຍ​ສັງຄົມ. ການ​ເອົາ​ເລືອດອອກບໍ່​ມີ​ຜົນ​ກະທົບ​​ຕໍ່​ສຸຂະພາບ ແລະ ຮ່າງກາຍ ​ເປັນ​ພຽງ​ພາກສ່ວນ​ ເລັກ​ນ້ອຍ​ຂອງ​ເລືອດ​​ໃນ​ຮ່າງກາຍ ເຊິ່ງ​ຮ່າງກາຍ​​ສາມາດ​ຜະລິດ​ເລືອດ​ທົດ​ແທນ​ໄດ້​ໄວ​ພຽງ​ຮັບປະທານອາຫານ ແລະ ພັກຜ່ອນ​ໃຫ້​ພຽງພໍ ພ້ອມ​ທັງ​ຍົກ​ໃຫ້​ ເຫັນ​ຄວາມ​ສຳຄັນ ແລະ ຈຳເປັນ​ໃນ​ການ​ນຳ​ໃຊ້​ເລືອດ​ເຂົ້າ​ໃນ​ວົງ​ການການ​ແພດ ເພື່ອ​ປິ່ນ​ປົວ, ຮັກສາ​ຊີ​ວີດ​ຂອງມວນ​ມະນຸດ​. ຜ່ານ​ມາ​ມີ​ຄົນ​ເຈັບທີ່ເຂົ້າມາ ​ໃຊ້​ບໍລິການ​ເລືອດ ເພື່ອ​ຮັກສາ ແລະ ປິ່ນ​ປົວ​ເປັນ​ຈຳນວນ​ຫຼວງຫຼາຍ ໂດຍ​ສະເພາະ​ກຸ່ມ​ຄົນທີ່ຕ້ອງການ​ເລືອດ​ສ່ວນ​ຫຼາຍແມ່ນ​ການຜ່າຕັດ, ແມ່ຍິງ​ທີ່​ໄດ້​ຮັບ ​ຜົນ​ກະທົບ​ຈາກ​ການ​ເກີດ​ລູກ, ພະຍາດ​ໄຂ້ເລືອດອອກ, ການ​ເກີດ​ອຸບັດ​ຕິ​ເຫດຕ່າງໆ ແລະ ອື່ນໆ. ສະຫາຍ ພັນ​ຕີ ນາງ ອໍລະໄທ ໄຊ​ໂກສົນ ແພດ​ປະຈຳ​ກອງ​ ໂຮງງານ​ປະສານ​ເຫຼົ່າ ຫຼວງ​ພະ​ບາງ ໃຫ້​ຮູ້​ວ່າ: ໃນ​ໄລຍະ​ຜ່ານ​ມາໂຮງງານ​ປະສານ​ເຫຼົ່າ​ຫຼວງພະ​ບາງ​ໄດ້​ມີ​ການ​ພົວພັນ​ຮ່ວມ​ມື​ກັບ​ສູນ​ບໍລິຈາກ​ເລືອດ​ ອົງການ​ກາ ແດງ​ລາວ​ ສາຂາ​ແຂວງຫຼວງ​ພະ​ບາງ ​ຈັດ​ກິດຈະກຳຮັບ​ບໍລິຈາກ​ເລືອດ​ໄດ້​ຫຼາຍ​ຄັ້ງ, ສຳລັບ​ການ​ຮັບ​ບໍລິຈາກ​ເລືອດ​ຄັ້ງ​ນີ້​ ໄດ້​ເລືອດ​ທັງ​ໝົດ 4.200 ຊີ​ຊີ.

     ໂອກາດ​ນີ້, ທ່ານ ນາງ ພູທອນ ສຸວັນນະ​ຈັກ ໄດ້​ຕາງໜ້າ​ອົງການ​ກາແດງ​ລາວ ສະແດງ​ຄວາມ​ຮູ້​ບຸນຄຸນ ແລະ ຂອບໃຈເປັນຢ່າງ​ສູງ​ມາ​ຍັງ​ພະນັກງານ- ນັກຮົບໂຮງ​ງານ​ປະສານ​ເຫຼົ່າ​ ຫຼວງ​ພະ​ບາງ ທີ່​ເຫັນ​ໄດ້​ຄວາມ​ໝາຍ​ສຳຄັນ ແລະ ເຂົ້າ​ຮ່ວມ​ກິດຈະກຳ​ການ​ບໍລິຈາກ​ເລືອດ​ເພື່ອ​ຊ່ວຍ​ເຫຼືອ​ສັງຄົມ​ໃນ​ຄັ້ງ​ນີ້ ເຮັດ​ ໃຫ້​ການເຄື່ອນໄຫວ​ຮັບ​ບໍລິຈາກ​ເລືອດ​ສຳເລັດ​ຕາມ​ແຜນການ​ທີ່​ວາງ​ໄວ້.

ແຫຼ່ງທີ່ມາ: ອຸ່ນຄຳ ດວງປະເສີດ
ວັນທີ 14/12/2022