ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ສົກຮຽນ 2021-2022 ໂຮງຮຽນ​ການ​ທະຫານ​ທ້ອງຖິ່ນ​ແຂວງ​ໄຊ​ຍະ​ບູ​ລີ ກໍ່​ສ້າງ​ນາຍ​ສິບ ບັນລຸ​ຕາມ​ຄາດໝາຍ


    ໂດຍ​ປະຕິບັດ​ຕາມ​ຂໍ້​ຕົກລົງ ​ຂອງ​ກົມ​ໃຫຍ່​ເສນາ​ທິການກອງທັບ ວ່າ​ດ້ວຍອະນຸມັດໃຫ້ໂຮງ ຮຽນ​ການ​ທະຫານ​ທ້ອງຖິ່ນ ແຂວງ​ໄຊ​ຍະ​ບູ​ລີ ປິດ​ສົກຮຽນ​ ກໍ່ສ້າງ​ນາຍ​ສິບ​ທະຫານ​ຫານ​ຮາບ ຊຸດ​ທີ XI ລະບົບ 1 ປີ ສົກຮຽນ 2021-2022 ເຊິ່ງ​ມີ​ນັກຮຽນ​ກໍ່ສ້າງ​ນາຍ​ສິບ​ທັງ​ໝົດ 148 ສະຫາຍ.

     ສະຫາຍ ພັນ​ໂທ ສີ​ທັດ ສອນມາດ ຫົວໜ້າ​ການ​ທະຫານ ໂຮງຮຽນ​ການ​ທະຫານທ້ອງຖິ່ນ​ ແຂວງ​ໄຊ​ຍະ​ບູ​ລີ ໃຫ້​ຮູ້​ວ່າ: ໂຮງຮຽນ​ການ​ທະຫານ​ທ້ອງຖິ່ນ ​ແຂວງໄຊ​ຍະ​ບູ​ລີ ໄດ້​ຮັບ​ການ​ຊີ້​ນຳ ແລະ ອຳນວຍ​ຄວາມສະດວກຮອບດ້ານຈາກ​ກອງ​ບັນຊາ​ການ​ທະຫານ​ແຂວງ​ໄຊ​ຍະ​ບູ​ລີ, ພະ​ແນກ​ໂຮງຮຽນ​ການ​ທະຫານ ​ທ້ອງຖິ່ນ, ໂດຍ​ມີ​ໂຄງການ​ຫຼັກສູດ​ການ​ຮຽນ-ການ​ສອນ ໄດ້​ຜ່ານ​ອະນຸມັດ​ຈາກ​ກົມ​ໃຫຍ່​ເສນາ​ທິ​ການ​ກອງທັບ, ຄູ-ອາຈານ​ຫຼາຍ​ສະຫາຍ​ມີ​ວຸດ​ທິ​ການສຶກສາ ແລະ ມີ​ປະສົບ​ການ​ທີ່​ຊຳນິ​ຊຳນານ​ໃນການ​ຖ່າຍ​ທອດ​ຄວາມ​ຮູ້, ບົດຮຽນ​ບັນດາ​ເຫຼົ່າ​ຮົບ​ຕ່າງໆ​ໃຫ້​ນັກຮຽນ​ດ້ວຍ​ຄວາມ​ຮັບຜິດຊອບ​ສູງ, ນອກ​ນີ້ ກົມ​ກອງ​ຍັງ ​ ມີ​ສະຖານທີ່​ພັກ​ເຊົາ​ໃຫ້​ນັກຮຽນ, ມີ​ຫ້ອງ​ຮຽນ, ເຮືອນຄົວ​ກິນ​ເຂົ້າ​ລວມ​ໝູ່, ມີ​ສະ​ໝາມ​ຫັດ​ແອບຮ່ຳຮຽນ​ພາກ​ປະຕິບັດ​ຕົວ​ຈິງ​ກວ້າງຂວາງ. ສຳລັບ​ນັກຮຽນ ​ທີ່​ເຂົ້າ​ມາ​ຮຽນ​ສ່ວນ​ຫຼາຍ​ແມ່ນ​ໄດ້​ມາດຖານ​ໂດຍ​ຜ່ານ​ການ​ຄັດ​ເລືອກ​ຢູ່​ບັນດາ​ກົມ​ກອງ, ມີ​ຄວາມ​ຫ້າວຫັນ​ຕັ້ງໜ້າ​ເຝິກຝົນ​ຫຼໍ່​ຫຼອມ​ຕົນ​ເອງ​ໃຫ້​ກາຍເປັນ​ນັກ ຮຽນ​ດີ, ຮຽນ​ເກັ່ງ ແລະ ມີ​ຄຸນສົມບັດ​ສິນ​ທຳ​ປະຕິວັດ, ປະຕິບັດ​ບັນດາ​ລະບອບລະບຽບ​ວິໄນ​ຢ່າງ​ເຂັ້ມ​ງວດ, ມີ​ຄວາມ​ດຸໝັ່ນ​ຂະຫຍັນພຽນໃນ​ການ​ອອກ ແຮງ​ງານ​ເພີ່ມ​ພູນ​ຜະລິດຜົນ ແລະ ເຂົ້າ​ຮ່ວມ​ສ້າງ​ຂະ​ບວນ​ການ​ດ້ານຕ່າງໆມີ​ຄວາມສາມັກຄີ​ຊ່ວຍເຫຼືອເບິ່ງແຍງ​ເຊິ່ງ​ກັນ ແລະ ກັນ ບໍ່​ວ່າ​ດ້ານການ​ຮ່ຳຮຽນ ກໍ​ ຄື​ເວລາ​ເຈັບເປັນ, ມີ​ການ​ພົວພັນ​ສະນິດ​ແໜ້ນ​ກັບ​ອຳນາດ​ການ​ປົກຄອງ​ບ້ານ​ອ້ອມ​ຂ້າງ ແລະ ໃຫ້​ການຊ່ວຍເຫຼືອ​ດ້ານ​ແຮງ​ງານ​ແກ່ປະຊາຊົນ.

     ສະຫາຍ ພັນ​ໂທ ສີ​ທັດ ສອນ​ມາດ ໃຫ້​ຮູ້​ຕື່ມ​ອີ​ກວ່າ: ຄະນະ​ພັກ-ຄະນະ​ອຳນວຍ​ການ​ໂຮງຮຽນ​ ຕະຫຼອດ​ຮອດ​ພະນັກງານຄູ-ອາຈານ​ໃຫ້​ເອົາໃຈໃສ່​ສຶກ​ສາ ​ອົບຮົມ​ການເມືອງ-ນຳພາ​ແນວ​ຄິດ​ເປັນ​ບັນຫາ​ທີ່​ສຳຄັນ​ ສອດ​ຫ້ອຍ​ເຂົ້າ​ທຸກ​ຂົງເຂດ​ວຽກ​ງານ​ທີ່​ໄດ້​ຮັບ​ການ​ມອບ​ໝາຍ ແລະ ພ້ອມ​ກັນ​ຮັກສາ​ຄວາມ​ສາມັກ ຄີ​ໃຫ້​ແໜ້ນ​ແຟ້ນ, ມີ​ຄວາມ​ເປັນ​ເອກະ​ພາບ, ປະຕິບັດ​ຕາມ​ຫຼັກການ​ລວມ​ສູນ​ປະຊາທິປະໄຕ ເປັນ​ເຈົ້າ​ການ​ໃນ​ການ​ນຳພາ-ຊີ້​ນຳປັບປຸງຫຼັກສູດ​ການ​ຮຽນ-ການ ​ສອນ​ໃຫ້ມີ​ຄຸນ​ນະ​ພາບ. ຍາດ​ແຍ່ງ​ເອົາ​ຄວາມ​ຮູ້ຄວາມ​ສາມາດ​ທາງດ້ານທິດ​ສະ​ດີ-ຫຼັກການ ແລະ ພາກ​ປະຕິບັດ​ຕົວ​ຈິງ ເພື່ອ​ນຳໄປ​ຈັດ​ຕັ້ງ​ປະຕິບັດ​ໃຫ້​ສອດ ຄ່ອງ​ກັບ​ສະພາບ​ຄວາມ​ເປັນ​ຈິງ​ຂອງ​ກົມ​ກອງ, ເອົາໃຈໃສ່​ປະຕິບັດ​ບັນດາ​ຂໍ້​ກຳນົດ 7 ລະບອບ 18 ວຽກ​ໃນ​ມຶ້​ໜຶ່ງ​ຂອງ​ກອງທັບ ພ້ອມ​ກັນ​ເຮັດ​ສຳເລັດ​ໜ້າທີ່​ ການເມືອງ​ຂອງ​ຕົນ ແລະ ຕັ້ງໜ້າ​ເຝິກຝົນ​ຫຼໍ່​ຫຼອມ​ນັກຮຽນ​ໃຫ້​ກາຍເປັນ​ພະນັກງານ​ສືບ​ທອດ​ທີ່​ດີ​ຂອງ​ກອງທັບ. ຜ່ານ​ການຄົ້ນຄວ້າ​ຮ່ຳຮຽນ​ເປັນ​ເວລາ 1 ປີ ແລະ ຜ່ານ​ການ​ສອບເສັງ​ເຫັນ​ວ່າການ​ກໍ່ສ້າງ​ນາຍ​ສິບ​ທະຫານ​ຫານ​ຮາບ ຊຸດ​ທີ XI ບັນລຸ​ໄດ້​ຕາມ​ແຜນການ​ຄາດໝາຍ​ທີ່​ວາງ​ໄວ້.

ແຫຼ່ງທີ່ມາ: ສົມຈີນ ສິນຕາວັນ
ວັນທີ 13/12/2022