ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ໂຮງຮຽນ​ການ​ທະຫານ​ທ້ອງຖິ່ນ​ແຂວງ​ໄຊ​ຍະ​ບູ​ລີ ຫັດ​ແອບ​ປະສານ​ສຽງ​ແຕກ​ດ້ວຍ​ລູກປືນ​ແທ້


    ໃນ​ວັນ​ທີ 9 ພະຈິກ 2022 ນີ້, ໂຮງຮຽນ​ການ​ທະຫານ​ທ້ອງຖິ່ນ​​ແຂວງ​ໄຊ​ຍະ​ບູ​ລີ ໄດ້​ຈັດຕັ້ງຫັດ​ແອບ​ປະສານ​ສຽງ​ແຕກ​ຍິງເປົ້າ​ໝາຍ​ຕົວ​ຈິງ​ດ້ວຍ​ລູກປືນ ​ແທ້ ໃຫ້​ແກ່​ນັກຮຽນ​ກໍ່ສ້າງ​ນາຍ​ສິບ​ຊຸດ​ທີ XI ລະບົບ 1 ປີ ສົກ​ປີ 2021-2022 ໂດຍ​ການເຂົ້າ​ຮ່ວມຊີ້ນຳ​ຂອງ​ ສະຫາຍ​ ພົນ​ຈັດຕະວາ ກູດ ພົມມາ ຫົວ ໜ້າ​ການ​ທະຫານ ກອງ​ບັນຊາ​ການທະຫານ​ແຂວງ​ໄຊ​ຍະ​ບູ​ລີ, ມີ​ຄະນະ​ພັກ-ຄະນະ​ບັນຊາ, ຄະນະ​ຮັບຜິດຊອບ, ພະນັກງານຄູ​-ອາຈານ ແລະ ​ນັກຮຽນເຂົ້າ​ ຮ່ວມ.

     ການຈັດຕັ້ງ​ຍິງເປົ້າ​ໝາຍ​ຕົວ​ຈິງ​ດ້ວຍ​ລູກປືນ​ແທ້​ໃນ​ຄັ້ງ​ນີ້ ແມ່ນ​ເປັນ​ການ​ປະຕິບັດ​ຕາມ​ແຜນ​ອົບຮົມ​-ຫັດ​ແອບ​ສັງ​ລວມ​ປະສານ​ສຽງ​ແຕກ​ທ້າຍ​ປີ ຂັ້ນ​ໝູ່, ໝວດ ເຊິ່ງ​ລວມ​ມີ 5 ບົດ​ຄື: ໝວດ​ທະຫານ​ຮາບ​ຈັ້ງ​ທ່າ, ໝວດ​ທະຫານ​ຮາບ​ເຄື່ອນ​ທັບ​ປະ​ທະ​ກັບ​ສັດຕູ, ໝວດ​ທະຫານ​ຮາບ​ບຸກ​ຕີ​ສັດຕູ, ໝວດ​ທະຫານ​ ຮາບ​ດັກ​ສະກັດ ແລະ ໝວດ​ທະຫານ​ຮາບ​ຫຼອນ​ຕີ​ສັດຕູ ຜ່ານ​ການ​ກວດກາ​ຕົວ​ຈິງ​ເຫັນ​ວ່າ​ບັນລຸ​ຄາດໝາຍ​ດີ​ສົມຄວນ ເຊິ່ງ​ຜົນສຳເລັດ​ຂອງ​ການເຝິກແອບ ​ຮ່ຳຮຽນ​ໃນ​ຄັ້ງ​ນີ້​ແມ່ນຄູ-ອາຈານ​ເປັນ​ຜູ້​ຖ່າຍ​ທອດ​ວິຊາ​ຄວາມ​ຮູ້ ແຕ່​ສິ່ງ​ສຳຄັນ​ແມ່ນ​ການ​ຕັດສິນ​ໃຈ​ຂອງ​ບັນດາ​ສະຫາຍ​ນັກຮຽນ​ທີ່​ເຂົ້າ​ຮັບ​ການ​ອົບຮົມ-ຫັດ ​ແອບ ໄດ້​ພ້ອມ​ກັນ​ຕັ້ງໜ້າ​ຄົ້ນຄວ້າ​ຮ່ຳຮຽນ​ເພື່ອ​ກຳ​ແໜ້ນ​ບົດຮຽນ​ທັງ​ພາກ​ທິດ​ສະ​ດີ, ຫຼັກການ ແລະ ຕັ້ງໜ້າ​ເຝິກແອບ​ໃນ​ພາກ​ປະຕິບັດ​ຕົວ​ຈິງ, ຈຶ່ງ​ເຮັດໃຫ້ ການ​ຍິງເປົ້າ​ໝາຍ​ດ້ວຍ​ລູກປືນ​ແທ້​ແມ້ນ​ຍຳ ແລະ ໄດ້​ຮັບ​ໝາກຜົນ​ສູງ​ສົມຄວນ.

     ໃນ​ໂອກາດ​ນີ້​, ສະຫາຍ ພົນ​ຈັດຕະວາ ກູດ ພົມມາ ໄດ້​ໂອ້​ລົມ​ພ້ອມ​ທັງ​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຄູ​-ອາຈານ ທີ່​ໄດ້​ເອົາໃຈໃສ່​ຖ່າຍ​ທອດ​ບົດຮຽນ, ສ້າງ​ເນື້ອ​ໃນ​ເອກະສານສ້າງ​ກໍລະນີ​ໃຫ້​ແກ່​ນັກຮຽນ​ແກ້​ໄຂ​ຖືກ​ຕາມ​ຫຼັກການ​ສູ້​ຮົບ, ສຳລັບ​ນັກຮຽນ​ກໍໄດ້​ເອົາໃຈໃສ່​ເຮັດ​ວຽກ​ກະກຽມ​ໃນ​ທຸກ​ດ້ານໃນ​ເວລາ ​ຈັດ​ຕັ້ງ​ຮ່ຳຮຽນ​ສູ້​ຮົບ​ພື້ນຖານ​ເຫັນ​ວ່າ​ນັກຮຽນກຳ​ແໜ້ນ​ທິດ​ສະ​ດີ​ຫຼັກການແກ້​ໄຂ​ກໍລະນີ​ຫັດ​ແອບ​ສູ້​ຮົບ​ໄດ້​ຢ່າງ​ຄ່ອງ​ແຄ້ວ, ທີ່​ສຳຄັນ​ແມ່ນ​ຄູ​ອາຈານ​ຕ້ອງ​ໄດ້​ ສະຫຼຸບ​ຖອດ​ຖອນ​ບົດຮຽນ​ຜ່ານ​ການຈັດຕັ້ງ​ອົບຮົມ-ຫັດ​ແອບໃນ​ຄັ້ງ​ນີ້ ຊອກ​ໃຫ້​ເຫັນ​ດ້ານ​ດີ, ດ້ານ​ອ່ອນ​, ຂໍ້ຄົງຄ້າງ ແລະ ບົດຮຽນ​ທີ່​ຖອດ​ຖອນ​ໄດ້​ເພື່ອ​ນຳ ໄປ​ປັບປຸງ​ແກ້​ໄຂ​ໃນ​ຊຸດ​ຕໍ່ໆ​ໄປ​ໃຫ້​ດີ​ກວ່າ​ເກົ່າ.

ແຫຼ່ງທີ່ມາ: ໄຊຍະສັກ ມະນີວັນ
ວັນທີ 11/11/2022