ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ທະຫານ​ແຂວງ​ບໍ່ແກ້ວ ສະຫຼຸບ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ​ໄລຍະ 5 ປີ


    ວັນ​ທີ 12 ມັງກອນ 2023, ກອງ​ບັນຊາ​ການ​ທະຫານ​ແຂວງ​ບໍ່​ແກ້ວ ໄດ້​ເປີດ​ກອງ​ປະຊຸມ​ສະຫຼຸບ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ ໄລຍະ 5 ປີ (2017- 2021) ແລະ ວາງທິດ​ທາງ​ແຜນການ 5 ປີ (2022-2026), ໂດຍ​ການ​ເປັນ​ປະທານ​ຂອງ ສະຫາຍ ພັນ​ເອກ ບຸນ​ມີ ພາ​ມີ​ໄຊ ເລຂາ​ຄະນະ​ພັກ ຫົວໜ້າ​ການເມືອງ ​ກອງ​ບັນຊາ​ການ​ທະຫານ​ແຂວງ​ບໍ່​ແກ້ວ, ມີ​ຄະນະ​ພັກ-ຄະນະ​ບັນຊາ​ບັນດາ​ຫ້ອງ, ກອງ​ບັນຊາ​ການ​ທະຫານ​ເມືອງ, ພະແນກການ​ທີ່​ກ່ຽວ ຂ້ອງ ແລະ ກົມ​ກອງ​ຮາກ​ຖານ​​ເຂົ້າ​ຮ່ວມ.

     ໃນ​ກອງ​ປະຊຸມ ສະຫາຍ ພັນ​ໂທ ຄຳ​ສອນ ໄຊ​ຍະ​ວົງ ຄະນະ​ປະຈຳ​ພັກ​ກອງ​ບັນຊາ​ການ, ຫົວໜ້າ​ຫ້ອງ​ການເມືອງກອງ​ບັນຊາ​ການ​ທະຫານ​ແຂວງ​ບໍ່​ແກ້ວ ໄດ້​ຜ່ານ​ຮ່າງ​ບົດ​ລາຍ​ງານ​ໃນ​ການຈັດຕັ້ງ​ປະຕິບັດ​ວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານ​ທົ່ວ​ທະຫານ​ແຂວງ​ບໍ່​ແກ້ວ​ໄລຍະ 5 ປີ ຜ່ານ​ມາ, ເຊິ່ງ​ໄດ້​ຍົກ​ໃຫ້​ ເຫັນ​ການ​ນຳພາ-ຊີ້​ນຳ​ຂອງ​ຄະນະ​ພັກ-ຄະນະ​ບັນຊາ​ແຕ່​ລະ​ຂັ້ນ​ທີ່​ໄດ້​ເອົາໃຈໃສ່​ສຶກ​ສາ​ອົບຮົມ​ວຽກ​ງານ ການເມືອງ-ນຳພາ​ແນວ​ຄິດ​ເປັນ​ບັນຫາ​ສຳຄັນ, ເອົາໃຈ ໃສ່​ປັບປຸງ​ກໍ່ສ້າງ​ພັກ​ຖືກຕ້ອງ ແລະ ສອດຄ່ອງ​ຕາມ​ລະບຽບ​ຫຼັກການ​ຂອງ​ພັກ, ເຮັດ​ໃຫ້​ຖັນ​ແຖວ​ພະນັກງານ, ສະມາຊິກ​ພັກ​ໄດ້​ຮັບ​ການ​ສຶກ​ສາ​ອົບຮົມ, ເຊື່ອມ ​ ຊຶມ ແລະ ເຂົ້າໃຈ​ແຈ້ງ​ຕໍ່​ອຸດົມ​ການ​ຂອງ​ພັກ, ມີ​ທັດສະນະ​ຫຼັກໝັ້ນ, ມີ​ຄຸນສົມບັດ​ສິນ​ທຳ​ປະຕິວັດ, ມີ​ຄວາມ​ສັດຊື່​ບໍລິສຸດ​ຕໍ່​ພັກ, ຕໍ່​ປະເທດ​ຊາດ, ເປັນ​ແບບ ຢ່າງ​ນຳ​ໜ້າ​ໃນ​ທຸກ​ຂົງເຂດ​ວຽກ​ງານ, ເປັນ​ກຳລັງ​ຫຼັກ​ແຫຼ່ງ​ໃນ​ການ​ປະຕິບັດ​ແນວທາງປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບທົ່ວ​ປວງ​ຊົນ​ຮອບດ້ານ​ຂອງ​ພັກ. ຜ່ານ​ການຈັດຕັ້ງ​ປະຕິບັດວຽກ​ງານ​ຈັດ​ຕັ້ງ, ກໍ່ສ້າງ​ພັກ-ພະນັກງານໃນ​ໄລຍະ​ຜ່ານ​ມາ​ໄດ້​ຮັບ​ການ​ຢັ້ງຢືນ​ເປັນ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ​ໃນ​ປີ 2021 ມີ 41 ໜ່ວຍ​ພັກ, ກາງ 10 ໜ່ວຍ​ພັກ (ບໍ່​ໄດ້​ຈັດ​ປະເພດ 18 ໜ່ວຍ​ພັກ​ຍ້ອນ​ສ້າງຕັ້ງ​ຂຶ້ນ​ໃໝ່), ສະເພາະ​ໜ່ວຍ​ພັກທີ່​ຂຶ້ນ​ກັບ​ອົງຄະ​ນະ​ພັກ​ກອງ​ບັນ ຊາ​ການ​ທະຫານ​ແຂວງ ໄດ້​ຮັບ​ການ​ຢັ້ງຢືນ​ເປັນ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ​ມີ 34 ໜ່ວຍ​ພັກ, ກາງ 10 ໜ່ວຍ, ປັດຈຸບັນ​ທົ່ວ​ກອງ​ບັນຊາ​ການ ​ທະຫານ​ແຂວງ​ມີ​ສະມາຊິກ​ພັກ​ທັງ​ໝົດ 1.083 ສະຫາຍ, ທຽບໃສ່​ກອງ​ປະຊຸມ​ຈັດ​ຕັ້ງ​ ຄັ້ງ​ທີ I ເພີ່ມ​ຂຶ້ນ 231 ສະຫາຍ, ດ້ານ​ຄຸນ​ນະ​ພາບ​ຂອງ​ສະມາຊິກ​ພັກ​ ປະເພດ​ສະມາຊິກ​ພັກ​ແຂງ​ກວມ​ເອົາ 90,39%, ສະມາຊິກ​ພັກ​ກາງ​ກວມ​ເອົາ 7,94%, ບໍ່​ໄດ້​ແບ່ງ​ປະເພດ​ກວມ​ເອົາ 1,67%, ສະເພາະ​ອົງຄະ​ນະ​ພັກ​ກອງ​ບັນ ຊາ​ການ​ມີ​ສະມາຊິກ​ພັກ​ທັງ​ຫມົດ 895 ສະຫາຍ, ທຽບໃສ່​ກອງ​ປະຊຸມ​ຈັດ​ຕັ້ງ ​ຄັ້ງ​ທີ I ເພີ່ມ​ຂຶ້ນ 160 ສະຫາຍ, ດ້ານ​ຄຸນ​ນະ​ພາບ​ຂອງ​ສະມາຊິກ​ພັກປະເພດ​ ແຂງ​ກວມ​ເອົາ 72,40%, ປະເພດ​ກາງ​ກວມ​ເອົາ 8,04% ແລະ ບໍ່​ໄດ້​ແບ່ງ​ປະເພດ​ກວມ 19,56%.

ແຫຼ່ງທີ່ມາ: ໜັງສືພິມກອງທັບ
ວັນທີ 17/01/2023