ເປີດຂະບວນການແຂ່ງຂັນກິລາມວນຊົນ ທົ່ວກົມໃຫຍ່ການເມືອງກອງທັບ

     ວັນທີ 23 ຕຸລາ 2024 ນີ້, ກົມໃຫຍ່ການເມືອງກອງທັບ ໄດ້ເປີດຂະບວນການແຂ່ງຂັນກິລາມວນຊົນ ປະຈໍາປີ 2024 ໂດຍການເຂົ້າ
ຮ່ວມເປັນປະທານ ຂອງສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາກົມ,
ຫ້ອງການ, ກອງ, ພ້ອມດ້ວຍພະນັກງານ-ນັກຮົບ ແລະ ນັກກິລາ ເຂົ້າຮ່ວມ.

     ສະຫາຍ ພັນເອກ ສຸວັນນີ ດວງປະເສີດ ຮອງຫົວໜ້າຫ້ອງການເມືອງ ກົມໃຫຍ່ການເມືອງກອງທັບ ໄດ້ຜ່ານແຜນການ ແລະ ການກຽມ
ຄວາມພ້ອມ ເປີດຂະບວນການແຂ່ງຂັນກິລາມວນຊົນ ທົ່ວກົມໃຫຍ່ການເມືອງກອງທັບ ປະຈຳປີ 2024 ໃນຄັ້ງນີ້ ໂດຍມີຈຸດປະສົງເພື່ອຍູ້ແຮງ
ຂະບວນການຂໍ່ານັບຮັບຕ້ອນບັນດາວັນປະຫວັດສາດສໍາຄັນຕ່າງໆຂອງຊາດ, ຂອງພັກ, ຂອງກອງທັບ ໂດຍສະເພາະແມ່ນວັນຊາດທີ 2 ທັນວາ
ຄົບຮອບ 49 ປີ; ວັນຄ້າຍວັນ ເກີດປະທານ ໄກສອນ ພົມວິຫານ ຄົບຮອບ 104 ປີ; ວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ ແລະ
ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກົມໃຫຍ່ການເມືອງກອງທັບ ທີ່ຈະໄຂຂຶ້ນໃນມໍ່ໆນີ້ ໃຫ້ມີບັນຍາກາດຟົດຟື້ນ, ແຂງແຮງ ແລະ
ຕໍ່ເນື່ອງ, ເປັນການສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ ເຊື່ອໝັ້ນຕໍ່ການນໍາພາຂອງພັກ, ມີຈິດໃຈເບີກບານມ່ວນຊື່ນ, ຫັນ
ມາຫຼີ້ນກິລາໃຫ້ກວ້າງຂວາງ ແລະ ເພື່ອເຮັດໃຫ້ສຸຂະພາບແຂງແຮງ, ເປັນການຮັດແໜ້ນຄວາມສາມັກຄີ ລະຫວ່າງຂັ້ນເທິງ-ຂັ້ນລຸ່ມ, ກົມກອງກັບ
ກົມກອງ, ພະນັກງານ-ນັກຮົບ ແລະ ນັກກິລາດ້ວຍກັນ ທີ່ມີຢູ່ແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ ທັງເປັນການພົບປະແລກປ່ຽນບົດຮຽນເຊິ່ງກັນ
ແລະ ກັນ ເພື່ອພ້ອມກັນຕ້ານບັນດາປະກົດການຫຍໍ້ທໍ້ຕ່າງໆ ບໍ່ໃຫ້ເກີດຂຶ້ນຢູ່ໃນກົມກອງຂອງຕົນ ແລະ ເປັນການຄັດເລືອກເອົານັກກິລາປະເພດ
ຕ່າງໆທີ່ດີເດັ່ນ ປະກອບເຂົ້າເປັນທີມກິລາຂອງກົມໃຫຍ່ການເມືອງກອງທັບ ເພື່ອເຂົ້າຮ່ວມແຂ່ງຂັນກັບບັນດາກົມກອງອ້ອມຂ້າງ ກະຊວງປ້ອງ
ກັນປະເທດ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ ທີ່ ກົມໃຫຍ່ເສນາທິການຈັດຕັ້ງຂຶ້ນ ຢູ່ທີ່ສະໜາມກິລາກອງທັບ
ຫຼັກ 5, ສໍາລັບກິລາທີ່ນໍາມາແຂ່ງຂັນໃນຄັ້ງນີ້ມີ 3 ປະເພດຄື: ກິລາບານສົ່ງ, ກິລາກະຕໍ້ ແລະ ກິລາເປຕັງ.

     ໂອກາດດັ່ງກ່າວ, ສະຫາຍ ພົນຕີ ໄພວັນ ຈັນທະພົມມາ ໄດ້ຮຽກຮ້ອງມາຍັງ ຄະນະຮັບຜິດຊອບຈັດງານແຂ່ງຂັນ ຈົ່ງຍົກສູງຄວາມຮັບຜິດ
ຊອບຊີ້ນໍາ, ຄຸ້ມຄອງການແຂ່ງຂັນ ໃນຄັ້ງນີ້ໃຫ້ດໍາເນີນໄປຕາມເນື້ອໃນ, ກົດລະບຽບ, ກະຕິກາຂອງການແຂ່ງຂັນ ແລະ ມີຄວາມສະຫງົບ, ຄວາມ
ເປັນລະບຽບຮຽບຮ້ອຍ, ຄວາມປອດໄພໃຫ້ໄດ້ 100%. ພ້ອມນີ້ ກໍາມະການຕັດສິນ ຈົ່ງພ້ອມກັນຈັດຕັ້ງປະຕິບັດການແຂ່ງຂັນຕາມກົດລະບຽບ,
ຕາມກະຕິກາ, ຕາມຕາຕະລາງເວລາວາງອອກຢ່າງເຂັ້ມງວດ ແລະ ມີຄວາມບໍລິສຸດ ຍຸດຕິທໍາທຸກປະການສ່ວນນັກກິລາ, ຄູເຝິກທຸກປະເພດ, ທຸກ
ພາກສ່ວນ ກໍພ້ອມກັນຕັດສິນໃຈເຂົ້າຮ່ວມແຂ່ງຂັນຢ່າງສຸດກົກ, ສຸດປາຍ, ປະຕິບັດຕາມກົດລະບຽບ, ກະຕິກາວາງອອກຢ່າງເຂັ້ມງວດ, ຮັກສາ
ຄວາມສາມັກຄີ, ມີວິໄນ, ມີນໍ້າໃຈນັກກິລາ ແລະ ຖືເອົາເປັນການພົບປະແລກປ່ຽນບົດຮຽນເຊິ່ງກັນ ແລະ ກັນ, ຈາກນັ້ນສະຫາຍກໍໄດ້ກ່າວເປີດ
ຂະບວນການແຂ່ງຂັນກິລາຢ່າງເປັນທາງການ.

ແຫຼ່ງຂ່າວໂດຍ ສຸກສົງການ ຫຼ້າບຸນມີ
ວັນທີ 24/10/2024