ທາບທາມບຸກຄະລາກອນຜູ້ສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກ ກອງພົນທີ 2

    ວັນທີ 4 ກັນຍາ 2024 ນີ້, ຄະນະພັກ ກອງພົນທີ 2 ໄດ້ຈັດກອງປະຊຸມທາບທາມບຸກຄະລາກອນຜູ້ສະໝັກຮັບເລືອກຕັ້ງເຂົ້າໃນຄະນະບໍລິ
ຫານງານພັກ ກອງພົນທີ 2 ສະໄໝທີ VII ຮອບທີ 1, ໂດຍການເປັນປະທານຂອງ ສະຫາຍ ພົນຈັດຕະວາ ແສງມະນີວອນ ຄໍາມະນີ ກໍາມະການ
ຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ມີສະຫາຍ ພົນຈັດຕະວາ ວຽງແກ້ວ ສີສຸລາດ ເລຂາຄະນະພັກ,
ຫົວໜ້າການເມືອງ ກອງພົນທີ 2 ແລະ ສະຫາຍ ພົນຈັດຕະວາ ຄໍາດີ ໄຊຍະວົງ ຮອງເລຂາຄະນະພັກ, ຫົວໜ້າການທະຫານກອງພົນ, ມີວິຊາການ
ກົມຈັດຕັ້ງພັກ, ກໍາມະການຄະນະພັກກອງພົນ, ຄະນະຫ້ອງ, ພະແນກການ, ກົມກອງຮາກຖານ ແລະ ສະມາຊິກພັກຫຼັກແຫຼ່ງ ເຂົ້າຮ່ວມ.

     ສະຫາຍ ພົນຈັດຕະວາ ວຽງແກ້ວ ສີສຸລາດ ໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ, ສະຫາຍ ພັນຕີ ຄໍາໝັ້ນ ມິດສຸພົນ ວິຊາການ
ກົມຈັດຕັ້ງພັກ ກົມໃຫຍ່ການເມືອງກອງທັບ ໄດ້ຜ່ານມາດຖານ, ເງື່ອນໄຂ ຂອງຜູ້ທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກ ກອງພົນທີ 2
ສະໄໝທີ VII ຮອບທີ 1, ໂດຍອີງຕາມກົດລະບຽບຂອງພັກປະຊາຊົນປະຕິວັດລາວ ສິດໜ້າທີ່ດັ່ງນີ້: ຕ້ອງເປັນຄົນທີ່ມີຄຸນທາດການເມືອງໜັກ ແໜ້ນ,
ມີຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດທີ່ບໍລິສຸດ, ປອດໃສ. ມີຄວາມຮູ້ຄວາມສາມາດ, ກໍາແໜ້ນທິດສະດີມາກ-ເລນິນ, ແນວຄິດ
ໄກສອນ ພົມວິຫານ, ກໍາແໜ້ນແຜນນະໂຍບາຍຂອງພັກ. ມີລະດັບວິຊາສະເພາະໃດໜຶ່ງທີ່ແນ່ນອນ. ມີແບບແຜນການນໍາພາ ແລະ ວິທີເຮັດວຽກໂປ່ງ
ໃສ, ສອດຄ່ອງ, ຍຸຕິທໍາ, ຖືກຕ້ອງຕາມຫຼັກການລວມສູນປະຊາທິປະໄຕຂອງພັກຢ່າງເຂັ້ມງວດ. ມີສຸຂະພາບແຂງແຮງດີ, ສາມາດປະຕິບັດໜ້າທີ່ການ
ເມືອງທີ່ການຈັດຕັ້ງມອບໝາຍຢ່າງມີຜົນສໍາເລັດ. ເພື່ອເປັນທິດທາງໃຫ້ແກ່ການທາບທາມຄັ້ງນີ້ ບັນລຸຕາມຈຸດປະສົງ, ຄາດໝາຍ.

     ສະຫາຍ ພົນຈັດຕະວາ ແສງມະນີວອນ ຄໍາມະນີ ໄດ້ມີຄໍາເຫັນຊີ້ນໍາໃຫ້ຜູ້ແທນກອງປະຊຸມໃຊ້ສິດປະຊາທິປະໄຕຂອງຕົນ ເຂົ້າໃນການປ່ອນບັດຄັດ
ເລືອກເອົາບຸກຄະລາກອນຜູ້ສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກອງພົນ ດ້ວຍຄວາມຮັບຜິດຊອບສູງ, ມີຈຸດສຸມ ແລະ ສັດຈະວິພາກ,
ຫຼີກລ້ຽງແນວຄິດອະຄະຕິ, ກຸ່ມກ້ອນ, ຈູ້ມເຈື້ອເຊື້ອສາຍ, ໃຫ້ເບິ່ງທັດສະນະຫຼັກໝັ້ນຊົນຊັ້ນ, ນໍ້າໃຈຟົດຟື້ນປະຕິວັດ, ຄວາມຈົງຮັກພັກດີຕໍ່ແນວທາງ
ນະໂຍບາຍ ຂອງພັກ-ລັດ, ມີຄວາມຮູ້ຄວາມສາມາດໃນການນໍາພາ-ບັນຊາ, ເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ.ຈາກນັ້ນ, ສະມາຊິກພັກ
ກໍໄດ້ໃຊ້ສິດປະຊາທິປະໄຕ ຂອງຕົນປ່ອນບັດຄັດເລືອກເອົາບຸກຄະລາກອນຮັບສະໝັກເລືອກຕັ້ງເຂົ້າໃນຄະນະບໍລິຫານງານພັກກອງພົນ ສະໄໝທີ VII
ຮອບທີ 1 ໄດ້ຕາມຄາດໝາຍ.

ແຫຼ່ງຂ່າວໂດຍ ຄໍາຮັກ ໄຊວັນທອນ
ວັນທີ 05/09/2024