ໂອ້ລົມພະນັກງານຫຼັກແຫຼ່ງ ຢູ່ກອງບັນການທະຫານແຂວງຫົວພັນ

   ວັນທີ 24 ມີນາ 2023 ນີ້, ສະຫາຍ ພົນຕີ ພັນແສງ ບຸນພັນ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ເສນາທິການກອງທັບພ້ອມດ້ວຍ ຄະນະ ໄດ້ເຄື່ອນໄຫວຢ້ຽມຢາມ ແລະ ໂອ້ລົມພະນັກງານຫຼັກແຫຼ່ງ ຢູ່ກອງບັນຊາການທະຫານແຂວງຫົວພັນ ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກ ສະ ຫາຍ ພັນເອກ ເນກ ວິຂະຈັນ ຫົວໜ້າຫ້ອງການເມືອງ ກອງບັນຊາການທະຫານແຂວງຫົວພັນ, ພ້ອມດ້ວຍຄະນະພັກ-ຄະນະບັນຊາ, ອົງການ 5 ຫ້ອງ ຕະ ຫຼອດຮອດພະນັກງານຫຼັກແຫຼ່ງເຂົ້າຮ່ວມ.

   ສະຫາຍ ພັນເອກ ພູທິດ ແສນເພັງ ຄະນະພັກກອງບັນຊາການ ຫົວໜ້າຫ້ອງເຕັກນິກ ເຊິ່ງໄດ້ຍົກໃຫ້ເຫັນທີ່ຕັ້ງ ແລະ ຈຸດພິເສດລວມໂດຍຫຍໍ້ຂອງ ກອງບັນຊາການທະຫານແຂວງຫົວພັນ ໂດຍສະເພາະແມ່ນບັນຫາປະເຊີນໜ້າກັບສະພາບເສດຖະກິດ-ການເງິນ, ນ້ຳມັນເຊື້ອໄຟ, ຄ່າຂອງຊີບສູງ ແລະ ບັນ ຫາປະກົດການຫຍໍ້ທໍ້ອື່ນໆ, ການເປັນເຈົ້າການກຳແໜ້ນສະພາບການ, ສະກັດກັ້ນແກ້ໄຂໜໍ່ແໜງທີ່ຈະພາໃຫ້ເກີດຄວາມບໍ່ສະຫງົບ, ເອົາໃຈໃສ່ປ້ອງກັນເວນ ຍາມ ແລະ ຖືເອົາວຽກງານສຶກສາອົບຮົມການ ເມືອງ-ນຳພາແນວຄິດ ຕິດພັນກັບການຊຸກຍູ້ຂະບວນການແຂ່ງຂັນຍ້ອງຍໍພາຍໃຕ້ຄຳຂວັນ ຮັກຊາດ-ພັດທະ ນາ, ສ້າງກົມກອງ-ນັກຮົບວັດທະນະທຳ, ກົມກອງປອດໃສ, ປອດໄພ, ປອດຄະດີ ແລະ ກົມກອງປອດໃສ, ເຂັ້ມແຂງ, ໜັກແໜ້ນ ແລະ ຖືເອົາວຽກງານຮັບ ປະກັນແກ້ໄຂຊີວິດການເປັນຢູ່ ຕາມແຜນການ 4 ປູກ 4 ລ້ຽງ, ໃນນີ້ໄດ້ປູກຕົ້ນໄມ້ໃຫ້ໝາກ, ຕົ້ນໄມ້ອຸດສາຫະກໍາ, ປູກພືດລົ້ມລຸກ, ພືດຜັກຕາມລະດູການ, ລ້ຽງສັດ ແລະ ລ້ຽງປາເປັນຈຸດໜັກ, ພ້ອມນີ້ຍັງໄດ້ສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ຢ່າງເຂັ້ມງວດ ແລະ ເອົາໃຈໃສ່ພົວພັນຮ່ວມມື ກັບບັນດາກົມ ກອງເພື່ອນມິດທີ່ມີຊາຍແດນຕິດຈອດ ກັບ ແຂວງຫົວພັນ ເພື່ອແລກປ່ຽນວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານຄຸ້ມຄອງ-ປ້ອງກັນຊາຍ ແດນ, ຫຼັກໝາຍຊາຍແດນ ແລະ ແກ້ໄຂປະກົດການຫຍໍ້ທໍ້ອື່ນໆ ໃຫ້ທັນກັບເວລາ.

   ໃນໂອກາດນີ້, ສະຫາຍ ພົນຕີ ພັນແສງ ບຸນພັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດໄດ້ໃນໄລຍະຜ່ານມາ ພ້ອມທັງເນັ້ນໜັກໃຫ້ຄະນະພັກ- ຄະນະບັນຊາ ຈົ່ງຍົກສູງບົດບາດການນໍາພາຂອງພັກ, ກົດໝາຍຂອງລັດ, ກົດລະບຽບຂອງກອງທັບວາງອອກຢ່າງເຂັ້ມງວດ, ເອົາໃຈໃສ່ສຶກສາອົບຮົມການ ເມືອງ-ນຳພາແນວຄິດໃຫ້ພະນັກງານ-ນັກຮົບ ພາຍໃນກົມກອງໄດ້ຮັບຮູ້ເຊື່ອມຊຶມ, ກຳແໜ້ນຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ລະບຽບ ວິໄນຂອງກອງທັບຢ່າງເລິກເຊິ່ງ, ເອົາໃຈ ໃສ່ຕິດຕາມກວດກາເຮັດໃຫ້ສະພາບຂອບເຂດຄວາມຮັບຜິດຊອບຂອງຕົນໃຫ້ມີຄວາມສະຫງົບ ແລະ ປອດໄພ ໂດຍພື້ນຖານ, ສືບຕໍ່ຫັນເອົາພະນັກງານລົງກໍ່ສ້າງຮາກຖາກການເມືອງຢູ່ບັນດາກົມກອງ, ບ້ານ, ເມືອງໃຫ້ເປັນປົກກະຕິເພື່ອສ້າງບ້ານໃຫ້ມີຄວາມເຂັ້ມແຂງ, ເປັນບ້ານແບບຢ່າງດ້ານປ້ອງກັນຊາດ, ປັບປຸງແບບແຜນວິທີເຮັດວຽກໃຫ້ດີຂຶ້ນກວ່າເກົ່າ, ເອົາໃຈໃສ່ເສີມຂະຫຍາຍມູນເຊື້ອດຸໝັ່ນຂະຫຍັນພຽນເຂົ້າໃນ ການອອກແຮງງານສາມາດເພີ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອແກ້ໄຂບັນຫາປະກົດການຫຍໍ້ທໍ້ໃນສັງຄົມທີ່ຈະເກີດຂຶ້ນ ໃຫ້ທັນເວລາ, ເພີ່ມທະວີຄວາມສາມັກຄີພາຍໃນ-ພາຍນອກໃຫ້ໜັກແໜ້ນ ຕິດພັນກັບວຽກງານວິຊາສະເພາະກໍຄືໜ້າທີ່ການເມືອງຂອງກົມກອງ ໃຫ້ໄດ້ຮັບ ຜົນສຳເລັດສູງ ເພື່ອພັດທະນາກົມກອງໃຫ້ມີແບບແຜນທັນສະໄໝຂຶ້ນເລື່ອຍໆ. ຈາກນັ້ນສະຫາຍຍັງໄດ້ຢ້ຽມຢາມ ແລະ ພົບປະໂອ້ລົມພະນັກງານ-ນັກຮົບ ຢູ່ໂຮງຮຽນການທະຫານທ້ອງຖິ່ນ, ກອງບັນຊາການທະຫານເມືອງຊຽງຄໍ້ ແລະ ກອງບັນຊາການທະຫານເມືອງວຽງໄຊອີກດ້ວຍ.

ແຫຼ່ງທີ່ມາ:ສົມເພັດ ວິໄລຄໍາ
ວັນທີ 30/03/2023