ບັນດາແຂວງ-ນະຄອນຫຼວງ ໄດ້ຮັບລົດບັນທຸກ
ຮັບໃຊ້ວຽກຕອບໂຕ້ໄພພິບັດສຸກເສີນ
ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກຳມະການຄຸ້ມຄອງໄພພິບັດຂັ້ນ
ສູນກາງ ພ້ອມຄະນະໄດ້ມອບລົດບັນທຸກ 6 ລໍ້ 18 ຄັນ ພ້ອມອາໄຫຼ່ລົດບັນທຸກ 18 ຊຸດ ໃຫ້ບັນດາແຂວງ (ແຂວງລະ 1 ຄັນ) ແລະນະຄອນຫຼວງວຽງຈັນ
ເພື່ອຮັບໃຊ້ເຂົ້າໃນວຽກງານການຕອບໂຕ້ໄພພິບັດສຸກເສີນ, ເຊິ່ງພິທີມອບ-ຮັບ ໄດ້ຈັດຂຶ້ນໃນໂອກາດໄຂກອງປະຊຸມຄະນະກຳມະການຄຸ້ມຄອງໄພພິບັດ
ແຫ່ງຊາດທົ່ວປະເທດ ປະຈຳປີ 2022 ໃນວັນທີ 17 ກຸມພາ ຜ່ານມາ ທີ່ນະຄອນຫຼວງວຽງຈັນ.
ທ່ານ ນາງ ວິມາລາ ຄູນທະລັງສີ ຫົວໜ້າພະແນກຄວບຄຸມ ແລະ ຟື້ນຟູຫຼັງໄພພິບັດ, ກົມສັງຄົມສົງເຄາະ, ກອງເລຂາຄະນະກຳມະການຄຸ້ມຄອງໄພພິບັດ ຂັ້ນສູນກາງໄດ້ໃຫ້ຮູ້ວ່າ: ລົດບັນທຸກທີ່ນຳມາມອບຄັ້ງນີ້ ພາຍໃຕ້ໂຄງການຊ່ວຍເຫຼືອນອກໂຄງການ, ເປັນໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ ເຊິ່ງ ໂຄງການດັ່ງກ່າວນີ້, ແມ່ນປະຕິບັດຕາມເອກະສານໂຄງການແລກປ່ຽນລະຫວ່າງລັດຖະບານ ສປປ ລາວ ແລະ ສະຖານທູດຍີ່ປຸ່ນ ປະຈຳ ສປປ ລາວ ສະບັບລົງວັນທີ 23 ທັນວາ 2019 ທີ່ໄດ້ມອບໃຫ້ກະຊວງແຮງງານ ແລະ ສະຫວັດດີການສັງຄົມຕາງໜ້າໃຫ້ລັດຖະບານລົງນາມຮັບເອົາການຊ່ວຍເຫຼືອ ໂດຍກົມສັງຄົມສົງເຄາະໃນນາມຕາງໜ້າກະຊວງ ຮສສ ປະສານສົມທົບກັບ ບໍລິສັດ ຄາວຣ (Crown Agents) ເຊິ່ງເປັນບໍລິສັດທີ່ລັດຖະບານຍີ່ປຸ່ນ ມອບໝາຍໃຫ້ເປັນຜູ້ຕາງໜ້າລັດຖະບານຍີ່ປຸ່ນ ໃນການຈັດຊື້ພາຫະນະ-ອຸປະກອນກຽມພ້ອມ ແລະ ຕອບໂຕ້ໄພພິບັດ ໃນມູນຄ່າ 1 ຕື້ເຢນ ຕາມແຜນ ການເອກະພາບກັນແມ່ນໄດ້ຈັດຊື້ພາຫະນະ ແລະ ອຸປະກອນເຊັ່ນ: ລົດກະບະໂຟວິນ 20 ຄັນ ພ້ອມອາໄຫຼ່ລົດກະບະ 20 ຊຸດ; ລົດບັນທຸກເຄື່ອງຊ່ວຍເຫຼືອ 6 ລໍ້ 18 ຄັນ ພ້ອມອາໄຫຼ່ລົດບັນທຸກ 18 ຊຸດ ແມ່ນມອບໃຫ້ບັນດາແຂວງ ແລະ ນະຄອນຫຼວງ; ລົດໂຮງໝໍໂຟວິນ (4WD Ambulance) 10 ຄັນ ພ້ອມອາໄຫຼ່ລົດໂຮງໝໍ 6 ຊຸດ (ລົດນີ້ ແມ່ນຈະໄດ້ມອບໃຫ້ທາງກະຊວງສາທາ ແລະ ກະຊວງປ້ອງກັນປະເທດ). ພ້ອມກັນນີ້, ຍັງມີລົດບັນທຸກຕິດເຄື່ອງກອງ ນ້ຳ 3 ຄັນ, ພ້ອມອາໄຫຼ່ສຳຮອງເຄື່ອງຕອງນ້ຳ 2 ຊຸດ ແລະ ເຄື່ອງກອງນ້ຳແບບຄົວເຮືອນ 300 ອັນ, ພ້ອມໄສ້ກອງນ້ຳສຳຮອງ 600 ຊຸດ (ຈະໄດ້ມອບໃຫ້ກະ ຊວງສາທາລະນະສຸກ); ລົດໂຟກລິບ (Folk lift) 2 ຄັນ ພ້ອມອາໄຫຼ່ 2 ຊຸດ; ເຕັ້ນຊຸມຊົນ 30 ດາງ ພ້ອມອາໄຫຼ່ 30 ຊຸດ; ຜ້າບັດ 200 ອັນ; ເຕັ້ນຄອບຄົວ 300 ດາງ ພ້ອມອາໄຫຼ່ເຕັ້ນ 300 ຊຸດ (ມອບປະຈຳຢູ່ສາງຫຼັກ 17 ຂອງກະຊວງ ຮສສ ); ເຮືອກູ້ໄພ 100 ລຳ ພ້ອມອາໄຫຼ່ 100 ຊຸດ; ຈັກຕິດທ້າຍເຮືອ 100 ຊຸດ ແລະ ລໍ້ລາກເຮືອ 52 ຄັນ (ມອບໃຫ້ກະຊວງປ້ອງກັນປະເທດ); ລົດຈັກ (Off- Road Motorcycle) 10 ຄັນ (ມອບໃຫ້ກະ ຊວງແຮງງານ ແລະ ສະຫວັດດີການສັງຄົມ).
ບັນດາພາຫະນະ ແລະ ອຸປະກອນດັ່ງກ່າວ, ແມ່ນຢູ່ໃນຂະບວນການ ຈັດຊື້ ແລະ ນຳເຂົ້າຂອງລັດ ຖະບານຍີ່ປຸ່ນ, ມີພາຫະນະ ແລະ ອຸປະກອນບາງອັນແມ່ນ ຢູ່ໃນການສຳເລັດການນຳເຂົ້າ ແລະ ມອບໃຫ້ພາກສ່ວນທີ່ກ່ຽວຂ້ອງແລ້ວ, ຄາດວ່າບັນດາພາຫະນະອຸປະກອນດັ່ງກ່າວນີ້ ຈະສຳເລັດໃນການມອບພາຫະນະ ທັງໝົດໃນທ້າຍປີ 2023 ນີ້.
ແຫຼ່ງທີ່ມາ: ນັກຂ່າວກະຊວງແຮງງານ ແລະ ສະຫວັດດີການສັງຄົມ
ວັນທີ 24/02/2023