ກອງປະຊຸມລາຍງານສະພາບຜົນກະທົບ, ຜົນເສຍຫາຍ ຈາກໄພພິບັດ
ທີ່ເກີດຂຶ້ນຈາກ ພາຍຸດີເປຣຊັນ ພາຍຸໝູນເຂດຮ້ອນພຣະພິຣຸນ ແລະ ຝົນຕົກໜັກ

    ໃນວັນທີ 28 ສິງຫາ 2024 ນີ້, ຢູ່ທີ່ກະຊວງປ້ອງກັນປະເທດ, ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ເປີດກອງປະຊຸມລາຍ
ງານສະພາບຜົນກະທົບ, ຜົນເສຍຫາຍຈາກໄພພິບັດທີ່ເກີດຂຶ້ນຈາກພະຍຸດີເປຣຊັນ (Depression), ພະຍຸເຂດຮ້ອນພຣະພິຣຸນ (Prapiroon)
ແລະ ຝົນຕົກໜັກ ໃນລະຫວ່າງວັນທີ 18 ກໍລະກົດ ຫາ 21 ສິງຫາ 2024, ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາ
ລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີ ທ່ານ ນາງ ໃບ
ຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຮອງປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີບັນດາ
ຄະນະກໍາມະການຄຸ້ມຄອງໄພພິບັດຂັ້ນແຂວງ, ນະຄອນຫຼວງວຽງຈັນ, ກອງເລຂາຄະນະກໍາມະການຄຸ້ມຄອງໄພພິບັດ ພ້ອມດ້ວຍພາກສ່ວນກ່ຽວ
ຂ້ອງ ເຂົ້າຮ່ວມ.

     ທ່ານ ວົງຄໍາ ພັນທະນຸວົງ ຫົວໜ້າກົມສັງຄົມສົງເຄາະ ຫົວໜ້າກອງເລຂາຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ) ໄດ້
ລາຍງານກ່ຽວກັບສະພາບຜົນກະທົບ, ຜົນເສຍຫາຍຈາກໄພພິບັດທີ່ເກີດຈາກພາຍຸດີເປຣຊັນ (Depression), ພາຍຸໝູນເຂດຮ້ອນພຣະພິຣຸນ
(Prapiroon) ແລະ ຝົນຕົກໜັກ ໃນຄັ້ງວັນທີ 18 ກໍລະກົດ ຫາ 21 ສິງຫາ 2024 ທີ່ຜ່ານມາ, ພະຍຸດັ່ງກ່າວໄດ້ກໍ່ໃຫ້ມີເຫດການລົມພັດແຮງ,
ຝົນຕົກປານກາງ ຫາ ແຮງ, ຟ້າເຫຼື້ອມ ແລະ ນໍ້າຖ້ວມ ເຊິ່ງໄດ້ສົ່ງຜົນກະທົບ, ຜົນເສຍຫາຍຢູ່ພາກເໜືອ, ພາກກາງ ແລະ ພາກໃຕ້ຂອງ ສປປ ລາວ.
ມາຮອດປັດຈຸບັນມີທັງໝົດ 13 ແຂວງ ທີ່ໄດ້ຮັບຜົນກະທົບຄື: ນະຄອນຫຼວງວຽງຈັນ, ແຂວງ ສາລະວັນ, ຄໍາມ່ວນ, ຫຼວງພະບາງ, ຊຽງຂວາງ,
ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ແຂວງ ອຸດົມໄຊ ໃນຈໍານວນ 60 ເມືອງ, 541 ບ້ານ, 17.548
ຄອບຄົວ, ພົນລະເຮືອນ 36.208 ຄົນ, ຍິງ 15.384 ຄົນ, ເສຍຊີວິດ 3 ຄົນ ແລະ ສູນຫາຍ 1 ຄົນ, ຄອບຄົວຖືກຍົກຍ້າຍຊົ່ວຄາວ 72 ຄອບ
ຄົວ, ເຮືອນ 125 ຫຼັງ, ເນື້ອທີ່ທຳການຜະລິດ 9,763,28 ເຮັກຕາ, ເສັ້ນທາງ 177 ເສັ້ນ, ຂົວ 12 ແຫ່ງ, ຊົນລະປະທານ 79 ແຫ່ງ, ສຸກສາລາ
2 ແຫ່ງ, ນໍ້າລິນ 30 ແຫ່ງ, ໜອງປາ 334 ໜອງ, ສັດລ້ຽງ (ງົວ, ຄວາຍ, ແບ້, ໝູ ແລະ ສັດປີກ ) ລວມຈໍານວນ 13.478 ໂຕ ທີ່ໄດ້ຮັບຜົນ
ກະທົບ ແລະ ຜົນເສຍຫາຍ, ຄາດຄະເນມູນຄ່າຜົນກະທົບ, ຜົນເສຍຫາຍເບື້ອງຕົ້ນແມ່ນ 318.615.427.690 ກີບ ພ້ອມນັ້ນ, ໃນກອງປະຊຸມ
ຍັງໄດ້ຮ່ວມກັນປະກອບຄໍາຄິດເຫັນ ແລະ ເອກະພາບແບ່ງຄວາມຮັບຊອບຂອງຄະນະກໍາມະການຄຸ້ມຄອງໄພພິບັດຂັ້ນສູນກາງ ເພື່ອຈັດຕັ້ງ ກຽມ
ພ້ອມຮັບມືກັບໄພພິບັດໃນລະດູຝົນປີ 2024.

     ໂອກາດນີ້, ປະທານກອງປະຊຸມ ກໍໄດ້ເນັ້ນໜັກຫຼາຍບັນຫາທີ່ສໍາຄັນ ໃຫ້ຄະນະກໍາມະການຄຸ້ມຄອງໄພພິບັດຂັ້ນສູນກາງ ປະຕິບັດໜ້າທີ່
ຂອງຕົນຢ່າງຕັ້ງໜ້າຕາມການມອບໝາຍ ພ້ອມທັງກຽມພ້ອມຕະຫຼອດເວລາ ທັງເປັນເຈົ້າການ ສຸມໃສ່ແກ້ໄຂຈຸດທີ່ເກີດເຫດ ໃຫ້ວ່ອງໄວ ແລະ
ທັນເວລາ.

ແຫຼ່ງຂ່າວໂດຍ ຂກທ
ວັນທີ 28/08/2024