ສະຫາຍ ພົນເອກ ຈັນສະໝອນ ຈັນຍາລາດ ລົງຊີ້ນໍາ ແລະ
ກວດກາສະຖານທີ່ຈັດກອງປະຊຸມລັດຖະມົນຕີປ້ອງກັນປະເທດອາຊຽນ ແລະ ອາຊຽນ-ບວກ

    ວັນທີ 19 ພະຈິກ 2024 ນີ້, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນ
ປະເທດ ໄດ້ລົງຊີ້ນໍາ ແລະ ກວດກາສະຖານທີ່ຈັດກອງປະຊຸມ ລັດຖະມົນຕີປ້ອງກັນປະເທດອາຊຽນ ຄັ້ງທີ 18 ແລະ ອາຊຽນ-ບວກ ຄັ້ງ
ທີ 11 ທີ່ຈະຈັດຂຶ້ນຢູ່ນະຄອນຫຼວງວຽງຈັນ ສປປ ລາວ ໃນລະຫວ່າງວັນທີ 19-22 ພະຈິກ 2024 ນີ້, ໂດຍມີຄະນະຮັບຜິດຊອບ, ອະ
ນຸກຳມະການຈາກພາກສ່ວນຕ່າງໆ ແລະ ພະນັກງານວິຊາການ ເຂົ້າຮ່ວມ.

     ການລົງເຄື່ອນໄຫວຊີ້ນໍາ ແລະ ກວດກາສະຖານທີ່ຈັດກອງປະຊຸມ ຄັ້ງນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ເນັ້ນໜັກ
ໃຫ້ບັນດາ ອະນຸກໍາມະການ ແຕ່ລະພາກສ່ວນເປັນຕົ້ນແມ່ນ ດ້ານເນື້ອໃນ, ດ້ານພິທີການ, ແຜນການເຄື່ອນໄຫວດຳເນີນກອງປະຊຸມ ແລະ
ວຽກງານຮັບປະກັນອື່ນໆເຊັ່ນ: ວຽກງານສື່ສານ, ວຽກງານປ້ອງກັນ, ວຽກງານໂຄສະນາ, ວຽກງານເສນາຮັກ, ວຽກງານການບິນ, ວຽກ
ງານພາຫະນະເຕັກນິກ ລວມເຖິງສະຖານທີ່ຈັດກອງປະຊຸມ, ສະຖານທີ່ພັກເຊົາສຳລັບພະນັກງານ ແລະ ວຽກງານຮັບປະກັນອື່ນໆ. ໃນນີ້ ສະ
ເພາະພາກສ່ວນເນື້ອໃນ ຕ້ອງສືບຕໍ່ຄົ້ນຄວ້າໃຫ້ລະອຽດຖີ່ຖ້ວນ ແລະ ເລິກເຊິ່ງ ພ້ອມກັນນັ້ນ ບັນດາອະນຸກໍາມະການຕ້ອງຍົກສູງຄວາມຮັບ
ຜິດຊອບຕໍ່ໜ້າທີ່ການເມືອງຂອງຕົນທີ່ໄດ້ຮັບມອບໝາຍ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ເອົາໃຈໃສ່ຂອດປະສານວຽກ
ງານໃຫ້ລະອຽດ, ມີແບບແຜນ ແລະ ກຽມຄວາມພ້ອມຮອບດ້ານ ແນໃສ່ເຮັດໃຫ້ການດໍາເນີນກອງປະຊຸມສໍາເລັດຕາມແຜນການທີ່ວາງໄວ້
ແລະ ມີຄວາມສະຫງົບປອດໄພ, ມີຜົນສໍາເລັດຈົບງາມ. ຈາກນັ້ນ ສະຫາຍ ພົນເອກ ຈັນສະໝອນ ຈັນຍາລາດ ພ້ອມຄະນະຮັບຜິດຊອບ, ອະ
ນຸກຳມະການຈາກພາກສ່ວນຕ່າງໆ ແລະ ພະນັກງານວິຊາການ ກໍໄດ້ລົງກວດກາເບິ່ງບັນດາຫ້ອງປະຊຸມ, ຫ້ອງເຮັດວຽກ, ຫ້ອງພັກຜ່ອນ ແລະ
ຈຸດຕ່າງໆຕື່ມອີກ.

ແຫຼ່ງຂ່າວໂດຍ ຂກທ
ວັນທີ 20/11/2024