ກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນແຫ່ງ ສປປ ລາວ ສະບັບ ປີ 2015

    ໃນວັນທີ 18 ກັນຍາ 2024 ນີ້, ກະຊວງປ້ອງກັນປະເທດ ໄດ້ຈັດກອງປະຊຸມ ປະເມີນຜົນການຈັດຕັ້ງປະຕິບັດລັດຖະທຳມະນູນ ແຫ່ງ
ສປປ ລາວ ສະບັບ ປີ 2015 (2015 - 2024) ຂຶ້ນ. ໂດຍການເປັນປະທານຂອງ ສະຫາຍ ພົນຕີ ປະສິດ ທ່ຽງທຳ ຮອງລັດຖະມົນຕີກະຊວງ
ປ້ອງກັນປະເທດ, ມີຄະນະນຳກະຊວງ, ບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ມີ ຄະນະພັກ-ຄະນະບັນຊາ, ພະນັກງານຫຼັກ
ແຫຼ່ງຈາກອົງການກະຊວງ, ກົມກອງກຳລັງຫຼວງ, ກຳລັງທ້ອງຖີ່ນ, ວິທະຍາຄານ, ໂຮງຮຽນອ້ອມຂ້າງກະຊວງປ້ອງກັນປະເທດ ເຂົ້າຮ່ວມ.

     ສະຫາຍ ພັນເອກ ບົວສີ ສີວົງສາ ຫົວໜ້າກົມກົດໝາຍກະຊວງປ້ອງກັນປະເທດ ໄດ້ກ່າວວ່າ: ລັດຖະທຳມະນູນ ສະບັບທໍາອິດຂອງ ສປປ
ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນປີ 1991, ມາຮອດປັດຈຸບັນ ເປັນເວລາ 33 ປີ, ໃນໄລຍະຜ່ານມາ ກໍໄດ້ມີການປັບ
ປຸງ 2 ຄັ້ງ ຄື: ການປັບປຸງປີ 2003 ແລະ ປີ 2015. ລັດຖະທໍາມະນູນ ສະບັບປີ 2015 ມາຮອດປັດຈຸບັນ ກໍ່ເປັນເວລາ 9 ປີ ຊຶ່ງເປັນກົດໝາຍ
ພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ແກ່ການສ້າງ ແລະ ປັບປຸງບັນດາກົດໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ,
ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ສ້າງເງື່ອນໄຂພື້ນຖານໃຫ້ແກ່ການສ້າງລັດປະຊາທິປະໄຕປະຊາຊົນຂອງພວກເຮົາ ໃຫ້ເປັນລັດ
ທີ່ປົກ ຄອງດ້ວຍກົດໝາຍໃຫ້ນັບມື້ດີຂຶ້ນເທື່ອລະກ້າວ. ໃນດ້ານອື່ນແມ່ນເພື່ອຕອບສະໜອງກັບຄວາມຮຽກຮ້ອງຕ້ອງການໃນການຈັດຕັ້ງປະຕິ
ບັດແນວທາງປ່ຽນແປງໃໝ່ຢ່າງຮອບດ້ານ ແລະ ມີຫຼັກການຂອງພັກເຮົາ ໃນໄລຍະໃໝ່, ຄະນະບໍລິຫານງານສູນກາງພັກ ສະໄໝທີ XI ໄດ້ອອກ
ມະຕິ ສະບັບເລກທີ 05/ຄບສພ, ລົງວັນທີ 5 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ
ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ແລະ ກົມການເມືອງສູນກາງພັກ ກໍໄດ້ອອກມະຕິ ສະບັບເລກ
ທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່. ອີກປະການໜຶ່ງ, ປັດຈຸບັນ
ນີ້ພັກເຮົາພວມຄົ້ນຄວ້າສ້າງໂຄງການ ທາງການເມືອງຂອງພັກ ທີ່ຈະປະກາດໃຊ້ໃນຕໍ່ໜ້ານີ້. ທັງໝົດສິ່ງດັ່ງກ່າວ ໄດ້ຮຽກ ຮ້ອງໃຫ້ລັດເຮົາຕ້ອງ
ປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດເຮົາ ໃນໄລຍະໃໝ່.

     ເພື່ອຈັດຕັ້ງປະຕິບັດວຽກງານປັບປຸງລັດຖະທຳມະນູນໃຫ້ທັນເວລາ, ກົມການເມືອງສູນກາງພັກໄດ້ອອກມະຕິ ສະບັບເລກທີ 15/ກມສພ,
ລົງວັນທີ 22 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການລະດັບຊາດ ປັບປຸງລັດຖະທຳມະນູນ ໂດຍແມ່ນ ທ່ານ ປອ ໄຊສົມພອນ
ພົມວິຫານ ປະທານສະພາແຫ່ງຊາດ ເປັນປະທານຄະນະກຳມະການລະດັບຊາດ ປັບປຸງລັດຖະທຳມະນູນ ຊຶ່ງຄະນະກໍ່ໄດ້ປະຊຸມ ແລະ ວາງແຜນ
ການປັບປຸງລັດຖະທຳມະນູນ ແຕ່ນີ້ຫາກາງປີ 2025 ທັງແຕ່ງຕັ້ງກອງເລຂາ ແລະ ອະນຸກຳມະການຕ່າງໆ ເພື່ອຈັດຕັ້ງປະຕິບັດວຽກງານປັບປຸງລັດ
ຖະທຳມະນູນ. ໂດຍປະຕິບັດຕາມ ມາດຕາ 124, 125 ຂອງກົດໝາຍ ວ່າດ້ວຍການສ້າງນິຕິກໍາ ສະບັບເລກທີ 06/ສພຊ , ລົງວັນທີ 16 ພະຈິກ
2021 ຄະນະກຳມະການລະດັບຊາດ ປັບປຸງລັດຖະທໍາມະນູນ ໄດ້ວາງແຜນການດຳເນີນການປະເມີນຜົນການຈັດຕັ້ງປະຕິບັດລັດຖະທຳມະນູນ
ໃນຂອບເຂດທົ່ວປະເທດ. ໃນນີ້, ຢູ່ຂັ້ນສູນກາງ ໄດ້ຈັດກອງປະຊຸມປະເມີນຕາມຂົງເຂດວຽກງານ ຄື: ຂົງເຂດອົງການຈັດຕັ້ງພັກ, ແນວລາວສ້າງ
ຊາດ, ສະຫະພັນນັກຮົບເກົ່າ ແລະ ອົງການມະຫາຊົນ; ຂົງເຂດເສດຖະກິດ-ສັງຄົມ; ຂົງເຂດການປົກຄອງ ແລະ ຍຸຕິທໍາ ຫຼື ອໍານາດລັດ; ຂົງເຂດ
ປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ; ໃນການຈັດຕັ້ງປະຕິບັດລັດຖະທຳມະນູນ ໂດຍສະເພາະການຜັນຂະຫຍາຍການ
ໂຄສະນາ ແລະ ການປະຕິບັດເຂົ້າສູ່ລວງເລິກໃນແຕ່ລະຂົງເຂດ. ນອກນັ້ນ, ກໍມີການປະກອບຄຳເຫັນຂອງຜູ້ເຂົ້າຮ່ວມ ເຊິ່ງລ້ວນແຕ່ເປັນປະໂຫຍດ
ໃຫ້ແກ່ຄະນະຮັບຜິດຊອບເພື່ອນຳໄປຄົ້ນຄວ້າ ແລະ ປັບປຸງລັດຖະທຳມະນູນ. ສໍາລັບຢູ່ຂັ້ນສະພາແຫ່ງຊາດ ແມ່ນເພີ່ນໄດ້ຈັດກອງປະຊຸມປະເມີນ
ຢູ່ກະຊວງປ້ອງກັນປະເທດ ແລ້ວ 01 ຄັ້ງ, ສະເພາະຄັ້ງນີ້ ແມ່ນຂັ້ນກະຊວງໄດ້ຈັດຕັ້ງປະເມີນ ຕາມຄໍາແນະນໍາຂອງສະພາແຫ່ງຊາດ; ນອກຈາກນີ້
ແລ້ວ ຍັງຈະໄດ້ດຳເນີນການປະເມີນຜົນການປະຕິບັດລັດຖະທຳມະນູນ ໃນຮູບແບບທາບທາມຄວາມເຫັນທົ່ວໄປ ລວມທັງຜ່ານສື່ມວນຊົນຕ່າງໆ,
ທັ້ງນີ້ກໍເພື່ອເປັນການສະຫຼຸບຕີລາຄາຄືນການຈັດຕັ້ງປະຕິບັດລັດຖະທຳມະນູນ ໃນໄລຍະ 9 ປີ ຜ່ານມາ ໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນ
ສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນໃຫ້ແກ່ການຄົ້ນ
ຄວ້າ, ປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດໃຫ້ປະກົດ
ຜົນເປັນຈິງໄດ້.

ແຫຼ່ງຂ່າວໂດຍ ໄຊສະຫວາດ
ວັນທີ 19/09/2024