ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພົບປະກັບ
ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ

    ໃນວັນທີ 13 ສິງຫາ 2024 ນີ້, ທີ່ນະຄອນຫຼວງ ມົດສະກູ ສ ຣັດເຊຍ, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ,
ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ພົບປະສອງຝ່າຍ ກັບ ສະຫາຍ ອານເດຼ ແຣມມົບວິດຈ໌ ເບຍລາອູຊົບ
ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ ເນື່ອງໃນໂອກາດທີ່ເດີນທາງເຂົ້າຮ່ວມເປີດງານວາງສະແດງອຸປະກອນເຕັກນິກການທະຫານ
ສາກົນ 2024 ທີ່ ສ ຣັດເຊຍ.

     ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຂອບໃຈມາຍັງລັດຖະບານ ກໍ່ຄືກະຊວງປ້ອງກັນປະເທດແຫ່ງ ສ ຣັດ
ເຊຍ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າ ແກ່ ສປປ ລາວ ກໍ່ຄືກອງທັບປະຊາຊົນລາວ ໃນຫຼາຍດ້ານ ຕະຫຼອດໄລຍະຜ່ານມາ, ເປັນຕົ້ນແມ່ນ ການກໍ່ສ້າງ
ພະນັກງານບັນຊາ ແລະ ວິຊາການເຕັກນິກການທະຫານ, ການພົວພັນຮ່ວມມືດ້ານການເກັບກູ້ລະເບີດບໍ່ທັນແຕກເພື່ອມະນຸດສະທຳ ຢູ່ ສປປ ລາວ
ແລະ ວຽກງານດ້ານອື່ນໆ ເຊິງເປັນການປະກອບສ່ວນອັນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄື ການສ້າງກອງ
ທັບປະຊາຊົນລາວ ໃຫ້ເຕີບໃຫຍ່ເຂັ້ມແຂງ ແລະ ທັນສະໄໝ. ພ້ອມດຽວກັນນັ້ນ, ຄະນະຜູ້ແທນທັງສອງຝ່າຍກໍ່ໄດ້ຕີລາຄາຜົນສໍາເລັດ ຂອງການຮ່ວມ
ມືທາງດ້ານການທະຫານໃນໄລຍະຜ່ານມາ ແລະ ແຜນການພົວພັນຮ່ວມມືໃນຕໍ່ໜ້າ.

     ຈາກນັ້ນ, ສະຫາຍ ພົນເອກ ຈັນສະໝອນ ຈັນຍາລາດ ແລະ ສະຫາຍ ອານເດຼ ແຣມມົບວິດຈ໌ ເບຍລາອູຊົບ ໄດ້ຕາງໜ້າໃຫ້ລັດຖະບານຂອງທັງ
ສອງປະເທດ ລົງນາມ ກ່ຽວກັບການພົວພັນຮ່ວມມືດ້ານການທະຫານສະບັບໃໝ່ ເພື່ອເປັນບ່ອນອີງໃນການເສີມຂະຫຍາຍມູນເຊື້ອການພົວພັນຮ່ວມ
ມື ລະຫວ່າງສອງປະເທດ ເວົ້າສະເພາະແມ່ນ ກອງທັບປະຊາຊົນລາວ ແລະ ຣັດເຊຍ ໃຫ້ນັບມື້ໄດ້ຮັບການພັດທະນາດີຂຶ້ນ.

ແຫຼ່ງຂ່າວໂດຍ ທອງມາ ໄຊຍະເພັງສາ
ວັນທີ 15/08/2024