ພົນເອກ ຈັນສະໝອນ ຈັນຍາລາດ ຕ້ອນຮັບ ເອກອັກຄະລັດຖະທູດ ຝຣັ່ງ ປະຈຳລາວ ຄົນໃໝ່
ໃນວັນທີ 10 ພະຈິກ 2022 ນີ້, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ສປປ ລາວ
ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ຊິວ ແລັ້ງ ຊູອອກ ( Siv-Leng Chhuor) ເອກອັກຄະລັດຖະທູດວິສາມັນ ຜູ້ມີອຳນາດເຕັມ
ແຫ່ງ ປະເທດຝຣັ່ງ ປະຈຳ ສປປ ລາວ, ເນື່ອງໃນໂອກາດທີ່ມາດຳລົງຕຳແໜ່ງ ເປັນເອກອັກຄະລັດຖະທູດ ປະຈຳ ສປປ ລາວ ຄົນໃໝ່.
ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ ທ່ານ ນາງ ຊິວ ແລັ້ງ ຊູອອກ ພ້ອມຄະນະ ແລະ ໄດ້ຕີລາ ຄາຕໍ່ສາຍພົວພັນ, ການຮ່ວມມືຊ່ວຍເຫຼືອເຊິ່ງກັນ ແລະ ກັນ ຕະຫຼອດໄລຍະຜ່ານມາ ໂດຍສະເພາະໃນຂົງເຂດວຽກງານປ້ອງກັນຊາດ ໄດ້ຊ່ວຍເຫຼືອທາງດ້ານ ການແພດ, ການໃຫ້ທຶນຮຽນພາສາຕໍ່ກອງທັບປະຊາຊົນລາວ ແລະ ດ້ານມະນຸດສະທຳ ໄດ້ຊ່ວຍເຫຼືອສະໜັບສະໜູນກ່ຽວກັບການເກັບກູ້ລະເບີດທີ່ຍັງບໍ່ທັນ ແຕກ ຢູ່ ສປປ ລາວ, ເຊິ່ງເປັນການປະກອບສ່ວນເສີມສ້າງສາຍພົວພັນ ແລະ ການຮ່ວມມືລະຫວ່າງສອງປະເທດໃຫ້ນັບມື້ດີຂຶ້ນ.
ໂອກາດນີ້, ທ່ານ ນາງ ຊິວ ແລັ້ງ ຊູອອກ ກໍໄດ້ສະແດງຄວາມຂອບໃຈຕໍ່ ທ່ານ ພົນເອກ ຈັນສະໝອນ ຈັນຍາລາດ ທີ່ໄດ້ໃຫ້ການຕ້ອນຮັບອັນອົບອຸ່ນ ໃນຄັ້ງນີ້, ພ້ອມທັງໄດ້ທົບທວນຄືນເຖິງສາຍພົວພັນ, ການຮ່ວມມືລະຫວ່າງສອງປະເທດ ຝຣັ່ງ-ລາວ ໃນໄລຍະຜ່ານມາ, ເຊິ່ງໄດ້ນຳເອົາຜົນປະໂຫຍດຕົວຈິງ ມາໃຫ້ປະຊາຊົນສອງປະເທດ ພ້ອມທັງກ່າວວ່າຈະເອົາໃຈໃສ່ໃນການປະຕິບັດໜ້າທີ່ຂອງຕົນທີ່ໄດ້ຮັບມອບໝາຍເປັນຢ່າງດີ, ເພື່ອເປັນການປະກອບສ່ວນ ເຮັດໃຫ້ການພົວພັນຮ່ວມມືຂອງສອງປະເທດນັບມື້ດີຂຶ້ນ.
ແຫຼ່ງທີ່ມາ: ອາຫວຸ້ນ
ວັນທີ 11/11/2022