ມອບຫຼຽນໄຊພິລະອາດຫານ ຊັ້ນ ll
ແລະ ໃບຍ້ອງຍໍຂັ້ນກະຊວງປ້ອງກັນປະເທດ ໃຫ້ 2 ບໍລິສັດ ສປ ຈີນ

    ວັນທີ 9 ກັນຍາ 2024 ນີ້, ກົມໃຫຍ່ເຕັກນິກກອງທັບ ໄດ້ຈັດພິທີມອບນາມມະຍົດຫຼຽນໄຊພິລະອາດຫານ ຊັ້ນ ll ແລະ ໃບຍ້ອງຍໍຂັ້ນ
ກະຊວງປ້ອງກັນປະເທດ ໃຫ້ບໍລິສັດ ຄຳໄຊ ຢິນຊິງ ແລະ ບໍລິສັດ ລາວ-ຢູນ ຈຳກັດ. ໂດຍການເປັນປະທານ ຂອງສະຫາຍ ພົນເອກ ຈັນສະໝອນ
ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີສະຫາຍ ພົນຈັດຕະວາ
ທອງພັນ ສຸທຳມະວົງ ກຳມະການຄະນະພັກ ກະຊວງປ້ອງກັນປະເທດ, ຮັກສາການຫົວໜ້າກົມໃຫຍ່ເຕັກນິກກອງທັບ, ມີຄະນະພັກກົມໃຫຍ່,
ຄະນະກົມ, ຄະນະຫ້ອງການ, ບັນດາບໍລິສັດ ຕະຫຼອດຮອດພະນັກງານ-ວິຊາການທີ່ກ່ຽວຂ້ອງ ເຂົ້າຮ່ວມ.

     ສະຫາຍ ພົນຈັດຕະວາ ທອງພັນ ສຸທຳມະວົງ ລາຍງານໂດຍຫຍໍ້ກ່ຽວກັບທັງສອງບໍລິສັດ ໂດຍໃຫ້ຮູ້ວ່າ: ບໍລິສັດ ລາວ-ຢູນ ໄດ້ຮັບການສ້າງ
ຕັ້ງຂຶ້ນໃນວັນທີ 11 ຕຸລາ 1994 ແລະ ບໍລິສັດ ຄໍາໄຊ ຢິນຊິງ ໄດ້ຮັບການສ້າງຕັ້ງໃນວັນທີ 22 ທັນວາ 2017, ທັງສອງບໍລິສັດແມ່ນສັນຍາລັກແຫ່ງ
ການຮ່ວມມື ສປປ ລາວ ແລະ ສປ ຈີນ ໃນການສ້າງຄູ່ຮ່ວມສະຕາກຳ ນັບແຕ່ມື້ໄດ້ຮັບການສ້າງຕັ້ງ ຈົນຮອດປັດຈຸບັນ ສາມາດຍາດໄດ້ຜົນງານຫຼາຍ
ດ້ານ ແລະ ເຄື່ອນໄຫວດຳເນິນທຸລະກິດຖືກຕ້ອງຕາມລະບຽບກົດໝາຍຂອງການລົງທຶນ ແຫ່ງ ສປປ ລາວ, ເສຍພາສີອາກອນໃຫ້ລັດຖະບານລາວ
ຖືກຕ້ອງຄົບຖ້ວນ, ມອບພັນທະໃຫ້ກະຊວງປ້ອງກັນປະເທດຕາມການຖືຫຸ້ນໃນທຸກໆປີ, ພ້ອມທັງເຝິກອົບຮົມກໍ່ສ້າງບຸກຄະລະກອນໃຫ້ຝ່າຍລາວ
ເພີ່ມລະດັບຄວາມຮູ້, ຄວາມສາມາດໃນການຜະລິດວັດຖຸທາດລະເບິດ, ທັງສອງບໍລິສັດໄດ້ພົວພັນສາມັກຄີຢ່າງສະໜິດແໜ້ນກັບພໍ່-ແມ່ປະຊາຊົນ
ໃນທ້ອງຖິ່ນ ທີ່ບໍລິສັດ ແລະ ໂຮງງານຕັ້ງຢູ່, ເຮັດໃຫ້ປະຊາຊົນ, ອຳນາດການປົກຄອງທ້ອງຖິ່ນ ມີຄວາມຮັກແພງເຊື່ອຖື ແລະ ໃຫ້ການຮ່ວມມື.

     ສະຫາຍ ພັນເອກ ລຽນວິໄລ ພັນທອງຄຳ ຫົວໜ້າຫ້ອງການເມືອງ ກົມໃຫຍ່ເຕັກນິກ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍ
ການມອບຫຼຽນໄຊພິລະອາດຫານ ແລະ ໃບຍ້ອງຍໍກະຊວງປ້ອງກັນປະເທດ ອີງຕາມ ດຳລັດຂອງນາຍົກລັດຖະມົນຕີ ວ່າດ້ວຍ ການແຂ່ງຂັນ ແລະ
ຍ້ອງຍໍ, ກະຊວງປ້ອງກັນປະເທດ ຕົກລົງ ມອບຫຼຽນໄຊພິລະອາດຫານ ຊັ້ນ ll ໃຫ້ ບໍລິສັດ ຄຳໄຊ ຢິນຊິງ ຈຳກັດ ແລະ ບໍລິສັດ ລາວ-ຢູນ ຈຳກັດ
ແລະ ບຸກຄົນ ຈຳນວນ 6 ທ່ານ. ມອບໃບຍ້ອງຍໍກະຊວງປ້ອງກັນປະເທດ ໃຫ້ ບຸກຄົນ ທັງ 2 ບໍລິສັດ ຈຳນວນ 10 ທ່ານ, ຜົນງານດັ່ງກ່າວ ເປັນການ
ເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອຍາວນານລະຫວ່າງ ລາວ-ຈີນ ກໍ່ຄືການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ
ຕາມທິດ 4 ດີ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ລາວ-ຈີນ ແລະ ການເປັນຄູ່ຮ່ວມຊະຕາກຳ ລາວ-ຈີນ, ຈີນ-ລາວ
ໃຫ້ຢືນຢົງຕະຫຼອດໄປ.

     ໂອກາດດັ່ງກ່າວນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດປະດັບຫຼຽນໄຊພິລະອາດຫານຊັ້ນ ll ແລະ ມອບໃບຍ້ອງຍໍກະຊວງ
ປ້ອງກັນປະເທດໃຫ້ ບໍລິສັດ ແລະ ບຸກຄົນຢ່າງສົມກຽດ.

ແຫຼ່ງຂ່າວໂດຍ ຄຳສອນ ພົມໄຊຍາ
ວັນທີ 11/09/2024