ເຜີຍແຜ່ເຊື່ອມຊຶມ ມະຕິເລກທີ 04/ກມສພ ແລະ ມະຕິກອງປະຊຸມ
ຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI

    ວັນທີ 8 ສິງຫາ 2024 ນີ້, ກະຊວງປ້ອງກັນປະເທດ ໄດ້ຈັດກອງປະຊຸມ ເຜີຍແຜ່ເຊື່ອມຊຶມ ມະຕິເລກທີ 04/ກມສພ ແລະ ມະຕິກອງປະ
ຊຸມ ຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ໃຫ້ບັນດາກົມກອງອ້ອມຂ້າງ ກະຊວງປ້ອງກັນປະເທດ, ໂດຍການເປັນປະທານ
ຂອງ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນ
ເທດ, ມີບັນດາການນໍາກະຊວງ, ຕາງໜ້າຈາກ 4 ກົມໃຫຍ່, ຫ້ອງວ່າການກະຊວງປ້ອງກັນປະເທດ ພ້ອມດ້ວຍພະນັກງານຫຼັກແຫຼ່ງ ເຂົ້າຮ່ວມ.

     ສະຫາຍ ພົນເອກ ຈັນສະໝອນ ຈັນຍາລາດ ໄດ້ເຜີຍແຜ່ ມະຕິກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ວ່າ:
ກອງປະຊຸມດັ່ງກ່າວ ໄດ້ດໍາເນີນໃນລະຫວ່າງ ວັນທີ 13-17 ພຶດສະພາ 2024, ກອງປະຊຸມ ໄດ້ຕີລາຄາການຈັດຕັ້ງປະຕິບັດ ແຜນພັດທະນາເສດຖະ
ກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາ
ລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຍົກ
ໃຫ້ເຫັນ 9 ວຽກງານຈຸດສຸມ ເພື່ອສືບຕໍ່ຈັດຕັ້ງປະຕິບັດໃນ 6 ເດືອນທ້າຍປີ 2024; ສໍາລັບການປະຕິຮູບ ລັດວິສາຫະກິດ ໄດ້ຕີລາຄາຢ່າງກົງໄປກົງ
ມາ ຕໍ່ສະພາບການດໍາເນີນທຸລະກິດ ຂອງລັດວິສາຫະກິດໃນໄລຍະຜ່ານມາ ພ້ອມທັງ ເປັນເອກະພາບກຳນົດ 5 ຈຸດສຸມປະຕິຮູບ ລັດວິສາຫະກິດ ໃຫ້
ເຂັ້ມແຂງໃນຕໍ່ໜ້າ, ຕີລາຄາກ່ຽວກັບການຍົກສູງຄຸນນະພາບການດຳເນີນຄະດີ ຕາມຂະບວນການຍຸຕິທໍາ, ຕາມມະຕິເລກທີ 112/ກມສພ, ເປັນເອກະ
ພາບ ຕໍ່ບັນດາຜົນສຳເລັດທີ່ອົງການຮັບຜິດຊອບດໍາເນີນຄະດີ ຕາມຂະບວນຍຸຕິທໍາສ້າງມາໄດ້ ພ້ອມດຽວກັນ, ກໍໃຫ້ທິດຊີ້ນໍາ 7 ບັນຫາສໍາຄັນຕໍ່ວຽກ
ງານດັ່ງກ່າວ; ກ່ຽວກັບການປັບປຸງ ຄຸນນະພາບການສຶກສາ ແລະ ແກ້ໄຂບັນຫາ ການປະລະການຮຽນ, ການຂາດແຄນຄູສອນ ເຊິ່ງມະຕິກອງປະຊຸມ
ໄດ້ເນັ້ນໜັກໃຫ້ເອົາໃຈໃສ່ 3 ບັນຫາສຳຄັນ ພ້ອມນີ້, ມະຕິກອງປະຊຸມ ຍັງໄດ້ຍົກໃຫ້ເຫັນ ການກະກຽມເອກະສານຕົ້ນຕໍ ຂອງກອງປະຊຸມໃຫຍ່ ຄັ້ງທີ
XII ຂອງພັກ ແລະ ບັນດາວຽກງານຈຸດສຸມ ແຕ່ນີ້ຮອດກອງປະຊຸມຄົບຄະນະ ຄັ້ງທີ 9 ໃນທ້າຍປີ 2024. ຈາກນັ້ນ, ສະຫາຍ ພົນຕີ ສອນທອງ ພົມ
ລາວົງ ກໍາມະການຄະນະປະຈໍາພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ ໄດ້ເຜີຍແຜ່ ມະຕິ ເລກທີ 04/ກມສພ ວ່າ
ດ້ວຍການສ້າງເສດຖະກິດ ເອກະລາດ, ເປັນເຈົ້າຕົນເອງ ໃນໄລຍະໃໝ່, ຍົກໃຫ້ເຫັນເຖິງຄວາມຈໍາເປັນ ໃນການອອກມະຕິດັ່ງກ່າວ, ແນວຄິດຊີ້ນໍາ
ຂອງການສ້າງເສດຖະກິດ ເອກະລາດ, ເປັນເຈົ້າຕົນເອງ ແລະ ທິດທາງລວມ, ເປົ້າໝາຍສູ້ຊົນ, ແຜນນະໂຍບາຍ ເພື່ອເພີ່ມທະວີການແກ້ໄຂຄວາມ
ຫຍຸ້ງຍາກ ດ້ານເສດຖະກິດ-ການເງິນ, ສ້າງຄວາມເຂັ້ມແຂງໃຫ້ແກ່ການຜະລິດ, ການບໍລິການ, ລະບົບການເງິນ-ເງິນຕາ ແລະ ການຄຸ້ມຄອງບໍລິຫານ
ລັດ ເພື່ອເປັນພື້ນຖານໃຫ້ແກ່ການສ້າງເສດຖະກິດ ເອກະລາດ, ເປັນເຈົ້າຕົນເອງ ຢ່າງມີບາດກ້າວເດີນທີ່ໜັກແໜ້ນ. ຈຸດປະສົງ ຂອງການຈັດຕັ້ງເຜີຍ
ແຜ່ເຊື່ອມຊຶມເອກະສານດັ່ງກ່າວ ກໍເພື່ອເຮັດໃຫ້ພະນັກງານຫຼັກແຫຼ່ງ ອ້ອມຂ້າງກະຊວງປ້ອງກັນປະເທດ ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງ ຕໍ່
ເນື້ອໃນເອກະສານທີ່ກ່າວມາຂ້າງເທິງນັ້ນ ເພື່ອພ້ອມກັນນໍາໄປຈັດຕັ້ງຜັນຂະຫຍາຍ ໃຫ້ໄດ້ຮັບຜົນດີ.

ແຫຼ່ງຂ່າວໂດຍ ບຸນຊ້ອຍ
ວັນທີ 09/08/2024