ເປີດການນຳໃຊ້ອະນຸສາວະລີນັກບິນທະຫານ ອະດີດສະຫະພາບໂຊວຽດ
ພິທີເປີດການນຳໃຊ້ອະນຸສາວະລີນັກບິນທະຫານ ອະດີດສະຫະພາບໂຊວຽດ ທີ່ເສຍຊີວິດຢູ່ລາວໃນໄລຍະຊຸມປີ 1960-1970
ໄດ້ຈັດຂຶ້ນຢູ່ທີ່ບ້ານອາ
ກາດ ເມືອງສີໂຄດຕະບອງ ນະຄອນຫຼວງວຽງຈັນ ໃນວັນທີ 6 ທັນວາ 2022 ນີ້, ໂດຍການເຂົ້າຮ່ວມຂອງ ສະຫາຍ ພົນເອກ ຈັນສະໝອນ ຈັນຍາລາດ
ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີສະຫາຍ ວະລາດີເມຍ ກາລີນິນ
ເອກອັກຄະລັດຖະ
ທູດວິສາມັນ ຜູ້ມີອຳນາດເຕັມແຫ່ງ ສ ຣັດເຊຍ ປະຈຳ ສປປ ລາວ, ສະຫາຍ ອີກໍ ປານຟີລີບ ຮອງປະທານສະມາຄົມມິດຕະພາບ ລາວ-ຣັດເຊຍ, ມີບັນດາ
ການນຳພັກ-ລັດ, ຄະນະນຳກົມໃຫຍ່, ຫ້ອງການຝ່າຍທີ່ປືກສາທູດປ້ອງກັນຊາດ, ຊ່ຽວຊານ, ຄູ-ອາຈານ, ບັນດານາຍທະຫານຕາງໜ້າຈາກບັນດາອົງການ,
ກົມກອງອ້ອມຂ້າງກະຊວງປ້ອງກັນປະເທດ, ຕະຫຼອດຮອດນ້ອງນ້ອຍເຍົາວະຊົນເຂົ້າຮ່ວມ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນກ່າວເປີດວ່າ: ເພື່ອສະແດງເຖິງຄວາມຮູ້ບຸນຄຸນຂອບໃຈຕໍ່ການຊ່ວຍເຫຼືອອັນໃຫຍ່ຫຼວງໃນ ສະໄໝສົງຄາມປົດປ່ອຍປະເທດຊາດໃນເມື່ອກ່ອນ ກໍຄື ສປປ ລາວ ໃນຕະຫຼອດໄລຍະຜ່ານມາ ແລະ ລະນຶກເຖິງນັກບິນທະຫານໂຊວຽດ ອະດີດສະຫະພາບ ໂຊວຽດ ທີ່ເສຍສະຫຼະຊີວິດໃນການປະຕິບັດພັນທະສາກົນຢູ່ລາວເຮົາ. ສະນັ້ນ, ພັກ-ລັດຖະບານຂອງ ສປປ ລາວ ແລະ ສ ຣັດເຊຍ ໄດ້ຕົກລົງເຫັນດີໃຫ້ກະ ຊວງປ້ອງກັນປະເທດ ແຫ່ງ ສປປ ລາວ ເປັນຜູ້ຕາງໜ້າລັດຖະບານ ໂດຍສົມທົບກັບອົງການທີ່ກ່ຽວຂ້ອງຂອງ ສ ຣັດເຊຍ ກໍ່ສ້າງອານຸສາວະລີນັກບິນທະຫານ ອະດີດສະຫະພາບໂຊວຽດຂຶ້ນຢູ່ທີ່ນະຄອນຫຼວງວຽງຈັນ ແລະ ແຂວງຊຽງຂວາງ ທັງນີ້ກໍເພື່ອເປັນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາ ມັກຄີ ແລະ ການຮ່ວມມືລະຫວ່າງສອງລັດຖະບານ, ສອງກອງທັບ ແລະ ປະຊາຊົນສອງຊາດ ລາວ-ຣັດເຊຍ, ຣັດເຊຍ-ລາວ ທີ່ເປັນມູນເຊື້ອມາແຕ່ດົນນານ ໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ.
ສະຫາຍ ພັນເອກ ວິຊຽນ ສີສະອາດ ຮອງຫົວໜ້າກົມວິທະຍາສາດ-ປະຫວັດສາດການທະຫານ ຕາງໜ້າເຈົ້າຂອງໂຄງການກໍ່ສ້າງຂຶ້ນລາຍງານໂດຍຫຍໍ້ ກ່ຽວກັບໂຄງການດັ່ງກ່າວວ່າ: ການກໍ່ສ້າງອະນຸສາວະລີນັກບິນທະຫານອະດີດສະຫະພາບໂຊວຽດ ທີ່ເສຍຊີວິດຢູ່ລາວ ໄດ້ເລີ່ມແຕ່ວັນທີ 5 ພຶດສະພາ 2020 ຫາ 14 ຕຸລາ 2020 ແມ່ນໃຫ້ສຳເລັດ 100% ໃນສອງໂຄງການຢູ່ນະຄອນຫຼວງວຽງຈັນຄື: 1. ໂຄງການບຸກເບີກທີ່ຢູ່ອາໄສມີຄື: ປັບພື້ນທີ່, ສ້າງ ທາງດິນແດງອັດແໜ້ນ, ສ້າງຕາຄ່າຍໄຟຟ້າ, ເຈາະນໍ້າບາດານ ແລະ ສິ່ງອຳນວຍດ້ານຕ່າງໆເຊິ່ງເລີ່ມລົງມືກໍ່ສ້າງ 15 ພຶດສະພາ 2020 ສຳເລັດ 100% ໃນ ວັນທີ 8 ມີຖຸນາ 2020 ໃນມູນຄ່າການກໍ່ສ້າງ 1 ຕື້ກວ່າກີບ, 2. ໂຄງການກໍ່ສ້າງອະນຸສາວະລີນັກບິນທະຫານອະດີດສະຫະພາບໂຊວຽດ ຢູ່ໜ່ວຍ 16 ທີ່ ບ້ານອາກາດ ເມືອງສີໂຄດຕະບອງ ນະຄອນຫຼວງວຽງຈັນ ເລີ່ມແຕ່ວັນທີ 5 ມີຖຸນາ 2020 ຫາ 14 ຕຸລາ 2020 ແມ່ນສຳເລັດ 100%. ໃນມູນຄ່າການກໍ່ ສ້າງ 2 ຕື້ກວ່າກີບ. ການກໍ່ສ້າງອະນຸສາວະລີນັກບິນທະຫານອະດີດສະຫະພາບໂຊວຽດ ຈຸດປະສົງກໍເພື່ອແນ່ໃສ່ເປັນສະຖານທີ່ຈາລຶກບຸນຄຸນ, ຄຸນງາມຄວາມ ດີ, ຄວາມເສຍສະຫຼະຂອງນັກບິນທະຫານອະດີດສະຫະພາບໂຊວຽດ ແລະ ເພື່ອເປັນການຮຽນຮູ້ຂອງພະນັກງານລັດຖະກອນ, ທະຫານ-ຕຳຫຼວດ, ນ້ອງນ້ອຍ ເຍົາວະຊົນ, ນັກຮຽນ-ນັກສຶກສາ ແລະ ປັນຍາຊົນທຸກຊັ້ນຄົນ, ທັງເປັນສະຖານທີ່ໆຈະຕ້ອງຈົດຈຳໄວ້ຕະຫຼອດກາລະນານຂອງມູນເຊື້ອການພົວພັນຮ່ວມມື ຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງຊາດ, ສອງກອງທັບ ລາວ-ຣັດເຊຍ, ຣັດເຊຍ-ລາວ ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ແຫຼ່ງທີ່ມາ: ໜັງສືພິມກອງທັບ
ວັນທີ 07/12/2022