ຜູ້ນຳ ອາເມຣິກາ ແລະ ຜູ້ນຳຣັດເຊຍ ສົນທະນາກັນທາງໂທລະສັບ ກ່ຽວກັບບັນຫາ ອູແກຣນ
ທ່ານ ວະລາດິເມຍ ປູຕິນ ຜູ້ນຳຣັດເຊຍ ແລະ ທ່ານ ໂດນັນ ທຣຳ ຜູ້ນຳອາເມຣິກາ
ສຳນັກຂ່າວຕ່າງປະເທດລາຍງານຈາກ ນະຄອນຫຼວງວໍຊິງຕັນ ສະຫະລັດ ອາເມຣິກາ ໃນວັນທີ 13 ກຸມພາ 2025 ນີ້ວ່າ: ທ່ານ ໂດນັນ
ທຣຳ ຜູ້ນຳອາເມຣິກາ ໄດ້ເປີດເຜີຍຂ່າວ ພາຍຫຼັງການສົນທະນາສຳເລັດວ່າ, ໄດ້ສົນທະນາທາງໂທລະສັບກັບ ທ່ານ ວະລາດິເມຍ ປູຕິນ ຜູ້ນຳ
ຣັດເຊຍ ຢ່າງສ້າງສັນ ກ່ຽວກັບສະຖານະການໃນອູແກຣນ, ຕາເວັນອອກກາງ, ດ້ານພະລັງງານ, ປັນຍາປະດິດ, ຄວາມຍິ່ງໃຫຍ່ຂອງເງິນໂດລາ
ສະຫະລັດ ແລະ ເລື່ອງອື່ນໆ.
ຜູ້ນຳອາເມຣິກາ ກ່າວວ່າ: ເຫັນດີກັບຜູ້ນຳຣັດເຊຍ ກ່ຽວກັບການເຮັດວຽກຮ່ວມກັນ ເຊິ່ງລວມເຖິງການແລກປ່ຽນການຢ້ຽມຢາມລະດັບ
ຜູ້ນຳ, ການກະກຽມໃຫ້ທີມງານທີ່ກ່ຽວຂ້ອງກັບຫົວຂໍ້ທີ່ມີການສົນທະນາເຈລະຈາຮ່ວມກັນໃນທັນທີ ໂດຍສະເພາະແມ່ນຄຳວ່າ ສາມັນສຳນຶກ
ທີ່ຜູ້ນຳຣັດເຊຍ ສະເໜີ ແລະ ຢັ້ງຢືນມາຕະຫຼອດນັ້ນ ຜູ້ນຳ ອາເມຣິກາ ເຫັນດີນຳເປັນຢ່າງຍິ່ງ. ການເປີດເຜີຍຂ່າວຄັ້ງນີ້, ໄດ້ຮັບການຢັ້ງຢືນຈາກ
ທຳນຽບຂາວ ແລະ ທຳນຽບເຄຣມລິນ ວ່າ: ການສົນທະນາໃຊ້ເວລາເຖິງ 90 ນາທີ, ຖືເປັນການສົນທະນາທາງໂທລະສັບຢ່າງເປັນທາງການ ຄັ້ງ
ທຳອິດ ລະຫວ່າງ ຜູ້ ນຳສອງປະເທດ ນັບຕັ້ງແຕ່ ຣັດເຊຍ-ອູແກຣນ ເລີ່ມປະທະກັນດ້ວຍກຳລັງທະຫານໃນວັນທີ 24 ກຸມພາ 2022 ເປັນຕົ້ນ
ມາ, ເນື່ອງຈາກຜູ້ນຳຄົນກ່ອນ ບໍ່ເຄີຍສົນທະນາທາງໂທລະສັບກັບຜູ້ນຳ ຣັດເຊຍ ແລະ ບໍ່ເຄີຍໄປຢ້ຽມຢາມປະເທດຣັດເຊຍ ຢ່າງເປັນທາງການ.
ຜູ້ນຳອາເມຣິກາ ກ່າວຕື່ມວ່າ: ການພົບປະປຶກສາຫາລືຄັ້ງສຳຄັນກັບຜູ້ນຳ ຣັດເຊຍ ຈະເກີດຂຶ້ນ ໃນອະນາຄົດອັນໃກ້ນີ້ ທີ່ປະເທດ ອາຣາບີ ຊາອູ
ດິດ ເນື່ອງຈາກເຈົ້າຊາຍໂມຮຳເໝັດ ບິນ ຊັນມານ ມົງກຸດລາຊະກຸມານ ແຫ່ງ ອາຣາບີ ຊາອູດິດ ເຊື້ອເຊີນໃນນາມປະເທດເປັນກາງ ທີ່ມີບົດບາດ
ອິດທິພົນສູງໃນເວທີສາກົນ. ຜູ້ນຳອາເມຣິກາ ຍັງໄດ້ເປີດເຜີຍຂໍ້ມູນການສົນທະນາບາງສ່ວນໃຫ້ຜູ້ນຳ ອູແກຣນ ຮັບຮູ້ອີກດ້ວຍວ່າ: ຄວາມຊ່ວຍ
ເຫຼືອທັງໝົດທີ່ ອາເມຣິກາ ມອບໃຫ້ແກ່ ອູແກຣນ ໄປແລ້ວນັ້ນ ມີລາຄາ ແລະ ຄິດໄລ່ອອກມາໃນຮູບແບບເອົາແຮ່ຫາຍາກ ມູນຄ່າ 5 ແສນລ້ານ
ໂດລາສະຫະລັດ ທີ່ອູແກຣນ ຕ້ອງຈ່າຍຄືນໃຫ້ແກ່ ອາເມຣິກາ.
ໃນວັນດຽວກັນ, ຢູ່ກອງປະຊຸມ ລັດຖະມົນຕີກະຊວງປ້ອງກັນປະເທດ ຂອງອົງການສົນທິສັນຍາປ້ອງກັນອັດລັງຕິກເໜືອ (ນາໂຕ) ລັດຖະ
ມົນຕີກະຊວງປ້ອງກັນປະເທດ ອາເມຣິກາ ກ່າວວ່າ: ການທີ່ລັດຖະບານກີແອບກຳນົດເປົ້າໝາຍວ່າ, ຕ້ອງການກັບໄປມີດິນແດນຄືກັບປີ 2014
ນັ້ນ ເປັນພຽງພາບລວງຕາ ແລະ ການຈະເຂົ້າເປັນສະມາຊິກນາໂຕ ຍິ່ງເປັນໄປບໍ່ໄດ້, ອາເມຣິກາ ຈະບໍ່ສົ່ງທະຫານຂອງຕົນເຂົ້າໄປປະຈຳການໃນ
ອູແກຣນ ບໍ່ວ່າຈະມີມະຕິແບບໃດກໍຕາມ ແລະ ຢັ້ງຢືນວ່າ, ຄວາມໝັ້ນຄົງຂອງ ອູແກຣນ ຕ້ອງແມ່ນຮັບປະກັນຈາກທະຫານເອີຣົບ.
ແຫຼ່ງທີ່ມາ: ຂກທ
ວັນທີ 17/02/2025