ໄລຍະ 4 ເດືອນຕົ້ນປີ 2025 ຜູ້ປ່ວຍພະຍາດ ໂຄວິດ-19 ຢູ່ ໄທ ເພີ່ມຂຶ້ນ 70.000 ກວ່າຄົນ
ສຳນັກຂ່າວຊ່ອງ 7 ໄທລາຍງານໃນວັນທີ 14 ພຶດສະພາ 2025 ວ່າ: ກົມຄວບຄຸມພະຍາດຂອງໄທ ເປີດເຜີຍຈຳນວນຜູ້ປ່ວຍໂຄວິດ-19
ເພີ່ມຂຶ້ນ 70.000 ກວ່າຄົນໃນໄລຍະ 4 ເດືອນທຳອິດຂອງປີ 2025, ມີຜູ້ເສຍຊີວິດແລ້ວ 19 ຄົນ, ຊີ້ໃຫ້ເຫັນວ່າຫຼັງຈາກເທດສະການປີໃໝ່
ຂອງໄທ ມີການເຈັບປ່ວຍເພີ່ມຂຶ້ນຢ່າງຕໍ່ເນື່ອງ, ພົບວ່າເປັນສາຍພັນ XEC ລະບາດໃນປະເທດໄທ.
ໃນວັນທີ 14 ພຶດສະພາ 2025, ໂຄສົກກົມຄວບຄຸມພະຍາດ ໄດ້ຖະແຫຼງຂ່າວກ່ຽວກັບສະຖານະການພະຍາດໂຄວິດ-19 ແລະ ພະຍາດ
ໄຂ້ຫວັດໃຫຍ່ ທີ່ເກີດຂຶ້ນໃນໄລຍະນີ້ ພ້ອມທັງແນະນຳວິທີການດູແລຕົນເອງໃຫ້ປອດໄພ. ສະຖານະການພະຍາດໂຄວິດ-19 ຕັ້ງແຕ່ວັນທີ 1 ມັງ
ກອນ - 14 ພຶດສະພາ 2025 ພົບຜູ້ປ່ວຍ 71.067 ຄົນ, ເສຍຊີວິດ 19 ຄົນ, ແນວໂນ້ມຜູ້ປ່ວຍສູງຂຶ້ນ ພົບການລະບາດແບບເປັນກຸ່ມ ຈຳນວນ
2 ເຫດການ. ນອກຈາກນີ້, ຫຼັງຈາກໄລຍະເທດສະການປີໃໝ່ໄທ ພົບວ່າມີຜູ້ປ່ວຍຈຳນວນເພີ່ມສູງຂຶ້ນຢ່າງຕໍ່ເນື່ອງ. ຂໍ້ມູນຈາກກົມວິທະຍາສາດ
ການແພດ ພົບວ່າ ໃນລະຫວ່າງ ເດືອນ ມັງກອນ - ກຸມພາ ຂອງປີນີ້ ປະເທດໄທພົບການລະບາດຂອງສາຍພັນ XEC ເພີ່ມຂຶ້ນ.
ສຳລັບຄຳແນະນຳການປ້ອງກັນຄວນປະຕິບັດດັ່ງນີ້: ລ້າງມືເລື້ອຍໆດ້ວຍສະບູ ແລະ ນ້ຳສະອາດ ກ່ອນຮັບປະທານອາຫານ ແລະ ຫຼັງຈາກເຂົ້າ
ຫ້ອງນ້ຳ, ບໍ່ໃຊ້ສິ່ງຂອງສ່ວນຕົວຮ່ວມກັບຄົນອື່ນ, ຫຼີກລ່ຽງການເຂົ້າໄປສະຖານທີ່ ທີ່ມີຄົນຫຼາຍໃນໄລຍະທີ່ມີການລະບາດ, ຖ້າຫຼີກລ່ຽງບໍ່ໄດ້
ຄວນໃສ່ໜ້າກາກອະນາໄມ, ເມື່ອມີອາການຕິດເຊື້ອທາງເດີນຫາຍໃຈເຊັ່ນ: ໄຂ້, ໄອ, ນ້ຳມູກໄຫຼ, ຕ້ອງໃສ່ໜ້າກາກອະນາໄມ ແລະ ລ້າງມືເລື້ອຍໆ,
ຫຼີກລ່ຽງການຢູ່ໃກ້ຊິດກັບຄົນອື່ນ ໂດຍສະເພາະກຸ່ມເດັກນ້ອຍ, ກຸ່ມຜູ້ສູງອາຍຸ ແລະ ຜູ້ມີພະຍາດປະຈຳຕົວ ແລະ ໄປຮັບການປິ່ນປົວຈາກແພດ,
ຖ້າພົບວ່າປ່ວຍເປັນພະຍາດຕິດຕໍ່ທາງເດີນຫາຍໃຈ ຄວນຢຸດພັກຮັກສາຕົວຈົນກວ່າຈະຫາຍເປັນປົກກະຕິ.
ແຫຼ່ງທີ່ມາ: ຂກທ
ວັນທີ 19/05/2025