ກົມໃຫຍ່ເສນາທິການກອງທັບ ມອບເງິນນະໂຍບາຍ ໃຫ້ນາຍທະຫານ ພັກການຮັບບຳນານ
ວັນທີ 14 ຕຸລາ 2022 ນີ້, ກົມໃຫຍ່ເສນາທິການກອງທັບ ໄດ້ຈັດພິທີມອບເງິນນະໂຍບາຍໃຫ້ນາຍທະຫານຂັ້ນສູງທີ່ພັກການຮັບບຳນານ ໂດຍການ ເປັນປະທານຂອງ ສະຫາຍ ພົນຕີ ສີດາລໍ່ ຈ່ົງເຕັ່ງເຈ້ຍຊ້າ ຮອງຫົວໜ້າກົມໃຫຍ່ເສນາທິການກອງທັບ, ມີຄະນະກົມ-ຫ້ອງການ, ພະແນກການ, ຄະນະພັກ-ຄະນະບັນຊາກົມກອງ ແລະ ພາກສ່ວນກ່ຽວຂ້ອງເຂົ້າຮ່ວມ. ສະຫາຍ ພັນໂທ ສົມຈິດ ຄຸນນະວົງ ຫົວໜ້າພະແນກນະໂຍບາຍຫ້ອງການເມືອງ ກົມໃຫຍ່ ເສນາທິການກອງທັບ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການປະຕິບັດນະໂຍບາຍໃຫ້ນາຍທະຫານຂັ້ນສູງ, ອີງຕາມກົດໝາຍວ່າ ດ້ວຍປະກັນສັງຄົມ (ສະບັບປັບປຸງ), ອີງຕາມດຳລັດຂອງນາຍົກລັດຖະມົນຕີ ແລະ ແຈ້ງການຂອງຄະນະຈັດຕັ້ງສູນກາງພັກ, ດັ່ງນັ້ນ, ກະຊວງປ້ອງກັນ ປະເທດຕົກລົງໃຫ້ສະຫາຍ ພົນຈັດຕະວາ ສິງສະຫວັດ ພົມມະສັກ ຮອງຫົວໜ້າກົມໃຫຍ່ເສນາທິການກອງທັບ ແລະ ສະຫາຍ ພັນເອກ ຄຳຕາ ວົງວັນດີ ຫົວໜ້າກົມໂຮງຮຽນ ກົມໃຫຍ່ເສນາທິການ ພັກການຮັບເງິນນະໂຍບາຍອຸດໜູນບຳນານ ແລະ ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍ ການ ອະນຸມັດໃຫ້ນາຍທະຫານພັກ ການຮັບບຳນານ ອີງຕາມກົດໝາຍວ່າດ້ວຍ ນາຍທະຫານກອງທັບປະຊົນລາວ (ສະບັບປັບປຸງ), ອີງຕາມກົດໝາຍວ່າດ້ວຍ ປະກັນສັງຄົມ (ສະບັບປັບປຸງ), ອີງຕາມການຄົ້ນຄວ້າ ແລະ ນຳສະເໜີຂອງກົມໃຫຍ່ການເມືອງກອງທັບ ກະຊວງປ້ອງກັນປະເທດຕົກລົງໃຫ້ ສະຫາຍ ພັນໂທ ຄຳເຜີຍ ໄຊຍະຫານ ຫົວໜ້າການທະຫານກອງຮ້ອຍ 202, ສະຫາຍ ພັນໂທ ສັງວອນ ປານທອງຄຳ ຮອງຮັບຜິດຊອບວຽກງານພະລາ ໂຮງງານຜະລິດ-ປະກອບສ້ອມແປງ 209, ສະຫາຍ ພັນຕີ ຈັນທະໜອມ ພົມມະວົງໄຊ ຊ່ວຍວຽກຂະແໜງບານເຕະກອງກິລາກອງທັບ, ສະຫາຍພັນຕີ ນາງ ສິມມະລີ ມູນມະນີ ແພດປະຈຳກອງຮ້ອຍ 51 ພັກການຮັບເງິນນະໂຍບາຍ ຄິດໄລ່ເງິນເດືອນບຳນານ ແລະ ອຸດໜູນເທື່ອທຳອິດ ນັບແຕ່ງວດ 3 ສົກປີ 2022 ເປັນຕົ້ນໄປ. ໂອກາດນີ້ ສະຫາຍ ພົນຕີ ສີດາລໍ່ ຈົ່ງເຕັ່ງເຈ້ຍຊ້າ ໄດ້ມີຄຳເຫັນໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ບັນດາສະຫາຍ ໄດ້ທຸ່ມເທເຫື່ອແຮງ, ສະຕິປັນຍາເຂົ້າໃນການປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ ຈົນເຮັດ ສຳເລັດໜ້າທີ່ການເມືອງອັນມີກຽດສະຫງ່າຂອງຕົນ, ພ້ອມນີ້ກໍໄດ້ເນັ້ນໜັກໃຫ້ບັນດາສະຫາຍທີ່ໄດ້ຮັບເງິນນະໂຍບາຍບຳນານໃນຄັ້ງນີ້, ຈົ່ງສືບຕໍ່ເປັນຫຼັກ ແຫຼ່ງແບບຢ່າງໃຫ້ແກ່ສັງຄົມ, ດຳລົງຊີວິດດ້ວຍຄວາມປອດໃສຂາວສະອາດ, ປະກອບສ່ວນເຂົ້າໃນການເຄື່ອນໄຫວນຳອຳນາດການປົກຄອງທ້ອງຖິ່ນທຸກ ຂັ້ນ, ສຶກສາອົບຮົມການເມືອງ-ນຳພາແນວຄິດ ໃຫ້ລູກຫຼານພໍ່ແມ່ປະຊາຊົນເຊື່ອມຊຶມຕໍ່ແນວທາງປ່ຽນແປງໃໝ່ຂອງພັກ, ປະຕິບັດລະບຽບກົດໝາຍຂອງ ລັດ ແລະ ນຳເອົາເງິນຈຳນວນກັ່ງກ່າວໄປໝູນໃຊ້ ໃນວຽກງານທີ່ຈຳເປັນຂອງຄອບຄົວໃຫ້ເກີດປະໂຫຍດສູງສຸດ, ຕັ້ງໜ້າສ້າງເສດຖະກິດພັດທະນາຄອບຄົວ ຕົນເອງໃຫ້ນັບມື້ກ້າວຂຶ້ນ.
ແຫຼ່ງທີ່ມາ: ເກດຕາວັນ
ວັນທີ 18/10/2022