ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

3 ກອງທັບ ກຳປູເຈຍ, ລາວ, ຫວຽດນາມ ສືບຕໍ່ເຝິກຊ້ອມກອບກູ້ໄພພິບັດຢ່າງຕັ້ງໜ້າ



     ເພື່ອເປັນການຮັບປະກັນໃຫ້ແກ່ການກອບກູ້ໄພພິບັດທີ່ອາດຈະເກີດຂຶ້ນໃນຕໍ່ໜ້າ, ວັນທີ 13ກັນຍາ 2022 ນີ້, 3 ກອງທັບ ກຳປູເຈຍ, ລາວ, ຫວຽດ
ນາມ (CLV) ໄດ້ສືບຕໍ່ຈັດຕັ້ງເຝິກຊ້ອມກອບ ກູ້ໄພພິບັດ, ຢູ່ທີ່ອ່າງນໍ້າຫຸມຢ່າງຕັ້ງໜ້າ, ໂດຍມີ ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີ ກະຊວງປ້ອງກັນປະເທດ ຂອງ ສປປ ລາວ, ຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ຫົວໜ້າຄະນະຊີ້ນຳເຝິກຊ້ອມໄພພິບັດ 3 ກອງ ທັບ (CLV), ມີ ສະຫາຍ ພົນຕີ ແປ້ນ ໂສກຣິດວິເຈຍ ຫົວໜ້າຫ້ອງການເສນາທິການທະຫານຮ່ວມກອງທັບ ຣາຊະອານາຈັກກຳປູເຈຍ, ມີ ສະ ຫາຍ ພົນ ຈັດຕະວາ ຮ່າທໍ່ບິ່ງ ຮອງກອງບັນຊາການ, ຫົວໜ້າເສນາທິການທະຫານເຂດ 4 ກອງທັບ ປະ ຊາຊົນຫວຽດນາມ, ມີຄະນະນຳກະຊວງປ້ອງກັນປະເທດ, ຄະ ນະນຳກຳລັງທະຫານ 3 ກອງທັບ (CLV) ແລະ ພາກສ່ວນກ່ຽວຂ້ອງເຂົ້າຮ່ວມ.

     ສະຫາຍ ພັນເອກ ທອງສະໄໝ ສຸກປະເສີດ ຮອງຫົວໜ້າກົມອົບຮົມ, ກົມໃຫຍ່ເສນາທິການກອງທັບ, ຜູ້ບັນຊາການພາກສະໜາມການເຝິກຊ້ອມກອບ ກູ້ໄພພິບັດ 3 ກອງທັບ (CLV) ໄດ້ລາຍງານໃຫ້ຮູ້ວ່າ: ການເຝິກຊ້ອມກອບກູ້ໄພພິບັດຄັ້ງນີ້ ແມ່ນເພື່ອເປັນການຍົກລະດັບຄວາມອາດສາມາດ ໃຫ້ 3 ກອງ ທັບ (CLV) ໃຫ້ມີຄວາມເຂັ້ມແຂງສາມາດຕອບໂຕ້ກັບໄພພິບັດທີ່ເກີດຂຶ້ນໄດ້ທັນເວລາ, ຮັບປະກັນຄວາມປອດໄພຕໍ່ຊີວິດ ແລະ ຊັບສິນຂອງປະຊາຊົນ ໃນເວລາປະສົບໄພພິບັດ, ສ່ວນເນື້ອໃນການເຝິກຊ້ອມປະກອບມີຄື: ລາດຕະເວນຊອກຄົ້ນຜູ້ປະສົບໄພຢູ່ຕາມຈຸດຕ່າງໆ; ກອບກູ້ ແລະ ຊອກຄົ້ນຜູ້ປະສົບ ໄພທີ່ຕິດຄ້າງຕາມບ້ານເຮືອນ ແລະ ເກາະດອນ; ກອບກູ້ເອົາຜູ້ປະສົບໄພຈົມໃຕ້ນ້ຳ; ໜ່ວຍແພດສຸກເສີນປະຖົມພະຍາບານຂັ້ນຕົ້ນນຳສົ່ງໂຮງໝໍພາກສະ ໜາມ; ຊອກຄົ້ນ-ກອບກູ້ຜູ້ປະສົບໄພຕຶກອາຄານຖະຫຼົ່ມ, ພູດິນ​ເຈື່ອນ; ກວດກາລົບລ້າງເຂດທີ່ມີສານພິດເຄມີ; ກອບກູ້ຄັດແຍກປະຖົມພະຍາ ບານຂັ້ນຕົ້ນ ສົ່ງໂຮງໝໍພາກສະໜາມ ແລະ ນຳສົ່ງຄົນບາດເຈັບໜັກໄປໂຮງໝໍແນວຫຼັງ.

     ໂອກາດນີ້, ສະຫາຍ ພົນຕີ ຈັນທອງ ສອນຕະອາດ ກໍໄດ້ມີຄຳເຫັນໂອ້ລົມຕໍ່ພິທີວ່າ: ການເຝິກ ຊ້ອມຮ່ວມກອບກູ້ໄພພິບັດ ລະຫວ່າງ 3 ກອງທັບ (CLV) ໃນຄັ້ງນີ້ຖືໄດ້ວ່າບັນລຸຕາມແຜນການທີ່ ວາງໄວ້ ເຊິ່ງຜົນງານດັ່ງກ່າວກໍຍ້ອນການນຳຂັ້ນສູງເອົາໃຈໃສ່ຊີ້ນຳຢ່າງໃກ້ຊິດ ແລະ ການເຝິກຊ້ອມດັ່ງ ກ່າວນອກຈາກຈະເປັນການຮຽນຮູ້ເຖິງວິທີທີ່ຊ່ວຍເຫຼືອຜູ້ປະສົບໄພຢ່າງຖືກຕ້ອງ ແລະ ປອດໄພແລ້ວ ຍັງເປັນການແລກປ່ຽນບົດຮຽນ, ປະສົບການດ້ານວິຊາ ສະເພາະ ແລະ ດ້ານວັດທະນະທຳ, ຮີດຄອງປະເພ ນີຮ່ວມກັນ, ເສີມສ້າງຄວາມສາມັກຄີ, ສາຍພົວພັນມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນໃຫ້ນັບມື້ນັບແໜ້ນແຟ້ນຍິ່ງໆຂຶ້ນ ພ້ອມທັງຮຽກຮ້ອງໃຫ້ທຸກພາກສ່ວນທີ່ເຂົ້າຮ່ວມການເຝິກ ຊ້ອມໃນຄັ້ງນີ້ ຈົ່ງຍົກສູງຄວາມຮັບຜິດຊອບ, ເປັນເຈົ້າ ການປະຕິບັດລະບຽບວິໄນ, ມະຕິຄຳສັ່ງ ແລະແຜນການເຝິກຊ້ອມໃຫ້ເຂັ້ມງວດ, ສິ່ງສຳຄັນແມ່ນຕ້ອງເພີ່ມທະວີການຮັກສາຄວາມສາມັກຄີຊ່ວຍເຫຼືອ ເຊິ່ງ ກັນ ແລະ ກັນ, ຮັບປະກັນຄວາມປອດໄພໃນທຸກດ້ານ. ນອກຈາກນີ້, ສະຫາຍ ຮອງລັດຖະມົນຕີ ຍັງໄດ້ສະແດງຄວາມຍ້ອງຍໍຕໍ່ຄະນະຮັບຜິດຊອບລວມທີ່ ໄດ້ເອົາໃຈໃສ່ໃນການກະກຽມຄວາມພ້ອມ ຮອບດ້ານ ແລະ ເນັ້ນໜັກໃຫ້ທຸກເຫຼົ່າຮົບທີ່ເຂົ້າຮ່ວມ ຈົ່ງເຝິກຊ້ອມດ້ວຍຄວາມເອົາໃສ່ ເພື່ອແນໃສ່ຮັບ ປະກັນ ຄວາມປອດໄພ ແລະ ໄດ້ຮັບຜົນສຳເລັດຢ່າງຮອບດ້ານ.

ແຫຼ່ງທີ່ມາ: ແສງເດືອນ
ວັນທີ 13/09/2022