ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ
ຢ້ຽມຢາມ ແລະ ເຮັດວຽກ ຢູ່ ສປປ ລາວ



    ສະຫາຍ ພົນເອກ ຟານວັນຢາງ ກຳມະການກົມການເມືອງສູນກາງພັກກອມມູນິດຫວຽດນາມ ລັດຖະມົນຕີກະຊວງປ້ອງກັນປະເທດແຫ່ງ ສສ ຫວຽດ ນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 13-17 ກັນຍາ 2022 ນີ້.ເຊິ່ງພິ ທີຕ້ອນຮັບທາງການໄດ້ຈັດຂື້ນໃນຕອນບ່າຍຂອງວັນທີ 13 ກັນຍາ 2022 ນີ້, ຢູ່ທີກະຊວງປ້ອງກັນປະເທດ ໂດຍການຕ້ອນຮັບຂອງ ສະຫາຍ ພົນເອກ ຈັນ ສະໝອນ ຈັນຍາລາດ ກຳມະການກົມການ ເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍ ຄະນະ.

     ພາຍຫຼັງສຳເລັດພິທີຕ້ອນຮັບຢ່າງເປັນທາງການ, ທັງສອງຝ່າຍກໍໄດ້ພົບປະແລກປ່ຽນຕີລາຄາຄືນ ສະພາບວຽກງານດ້ານຕ່າງໆທີ່ໄດ້ຮ່ວມມືກັນຈັດຕັ້ງ ປະ ຕິບັດໃນໄລຍະຜ່ານມາ ບົນພື້ນຖານທີ່ມີມູນເຊື້ອ ສາຍພົວພັນອັນດີງາມ ແລະ ຄວາມສາມັກຄີແບບພິເສດ ລະຫວ່າງສອງຊາດ, ສອງພັກ ກໍຄືສອງກອງ ທັບລາວ-ຫວຽດນາມ. ໃນໄລຍະຜ່ານມາ, ການປະຕິບັດອະນຸສັນຍາຮ່ວມມື ລະຫວ່າງສອງກະຊວງປ້ອງກັນປະເທດ ລາວ-ຫວຽດນາມ ພວກເຮົາໄດ້ບັນລຸ ໝາກຜົນຫຼາຍດ້ານຢ່າງໜ້າພາກພູມໃຈ, ກົນໄກການ ຈັດຕັ້ງປະຕິບັດອານຸສັນຍາໄດ້ມີຄວາມກົມກຽວກັນ, ມີການປະສານສົມທົບນຳກັນຢ່າງແໜ້ນແຟ້ນ ແລະ ມີປະສິດທິຜົນດີ, ບົນຈິດໃຈຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ, ສອງກອງທັບ ລາວ-ຫວຽດນາມ ອ້າຍນ້ອງຢ່າງ ແທ້ຈິງ. ພ້ອມດຽວກັນນີ້, ທັງສອງຝ່າຍກໍໄດ້ເຫັນ ດີເປັນເອກະພາບບົນພື້ນຖານແມ່ນປະຕິບັດຕາມການຕົກລົງຂອງກົມການເມືອງສູນກາງພັກທັງສອງຝ່າຍ ແລະ ອະນຸສັນຍາວ່າດ້ວຍການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງ 2 ກະຊວງປ້ອງກັນປະເທດ ລາວ-ຫວຽດນາມ ແຕ່ 2020-2024 ແລະ ແຜນ ການຮ່ວມມືໃນປີ 2022. ຮັກສາການພົບປະສ້າງສັນຊາຍແດນຂັ້ນລັດຖະມົນຕີ ທ້າຍປີ 2022 ນີ້ ເຊິ່ງລາວຈະເປັນເຈົ້າພາບຈັດ, ການຮ່ວມມືທາງດ້ານ ວຽກງານພັກ-ວຽກງານການເມືອງ, ການກໍ່ສ້າງກຳລັງ, ວຽກງານແລກປ່ຽນຄະນະຜູ້ແທນ, ແລກ ປ່ຽນຂໍ້ມູນຂ່າວສານ ແລະ ສືບຕໍ່ຈັດຕັ້ງປະຕິບັດວຽກງານ ກໍ່ສ້າງບ້ານ ແລະ ກຸ່ມບ້ານພັດທະນາຕາມບໍລິ ເວນຊາຍແດນ ໂດຍສະເພາະ 2 ກຸ່ມບ້ານ ຢູ່ແຂວງຜົ້ງສາລີ ແລະ ແຂວງຫົວພັນ ເຊິ່ງສອງຝ່າຍໄດ້ເປິດໂຄງ ການຢ່າງເປັນທາງການໃນຕົ້ນເດືອນສິງຫາ 2022 ຜ່ານມາ. ສືບຕໍ່ວຽກງານຂຸດຄົ້ນອັດຖິທະຫານ ອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະ ຊີວິດຢູ່ລາວໃນສະໄໝສົງຄາມກັບຄືນປະເທດ. ສືບຕໍ່ຊຸກຍູ້ວຽກງານເຕັກນິກ ແລະ ອຸດສາຫະກຳປ້ອງກັນຊາດສອງຝ່າຍ ເປັນຕົ້ນແມ່ນ: ການຊ່ວຍເຫຼືອລ້າ ການຈັດຫາທາງດ້ານອາວຸດຍຸດໂທປະກອນການແບກຫາບທີ່ຝ່າຍຫວຽດນາມສາມາດຜະລິດ ແລະ ຈຳໜ່າຍໃຫ້ຝ່າຍລາວໄດ້, ສືບຕໍ່ຊຸກຍູ້ວຽກງານຮ່ວມມື ແລະ ອຳນວຍຄວາມສະດວກໃນການຂົນສົ່ງອຸປະກອນເຕັກນິກການທະຫານຜ່ານດິນແດນຂອງຫວຽດນາມ ມາຍັງ ສປປ ລາວ, ເອົາ ໃຈໃສ່ຍົກສູງຄຸນນະ ພາບຂອງວຽກງານກໍ່ສ້າງພະນັກງານທະຫານໜຸ່ມລາວ ຢູ່ ສສ ຫວຽດນາມ ໃຫ້ໄດ້ທັງດ້ານປະລິມານ ແລະ ຄຸນນະພາບ, ພິເສດ ແມ່ນສະເໜີເພີ່ມຈຳນວນ ນັກຮຽນຮຸ່ນສືບທອດ ເຈີນກັວກຕ່ວນ ໃນປີສາມັກຄີມິດຕະພາບ ລາວ-ຫວຽດນາມ 2022 ນີ້, ສະເໜີໃຫ້ສອງກະຊວງປ້ອງກັນປະເທດ ລາວ-ຫວຽດນາມ ເຮົາສືບຕໍ່ສ້າງບັນດາກິດຈະກຳພົບປະສ້າງສັນ ເຊັ່ນ: ແລກປ່ຽນທາງດ້ານສິລະປະການສະແດງ,  ວັດທະນະທຳ ແລະ ແລກປ່ຽນນາຍທະຫານໜຸ່ມເຊິ່ງກັນ ແລະ ກັນ. ສືບຕໍ່ຍ້ອງຍໍກົມກອງລວມໝູ່ ແລະ ບຸກຄົນໃນປີສາມະຄີມິດຕະພາບ ລາວ-ຫວຽດນາມ 2022 ຂອງທັງສອງກອງທັບໃຫ້ມີບັນຍາກາດເບີກ ບານມ່ວນຊື່ນ ລວມໄປເຖິງບັນຫາອື່ນໆ ທີ່ທັງສອງຝ່າຍໄດ້ຕົກລົງ ແລະ ເຫັນດີຮ່ວມກັນ.

     ໂອກາດນີ້, ສະຫາຍ ພົນເອກ ຟານວັນຢາງ ກໍໄດ້ຕີລາຄາສູງຕໍ່ການຕ້ອນຮັບອັນອົບອຸ່ນ ແລະໄດ້ລາຍງານກ່ຽວກັບການເດີນທາງມາຢ້ຽມຢາມໃນຄັ້ງນີ້ ກໍເພື່ອເປັນການເພີ່ມພູນຄູນສ້າງຄວາມສາມັກຄີແບບພິເສດ, ຄວາມປອງດອງອັນແໜ້ນແຟ້ນ, ສະໜິດສະໜົມ ລະຫວ່າງປະຊາຊົນສອງຊາດ ລາວ- ຫວຽດ ນາມ, ຫວຽດນາມ-ລາວ ທັງເປັນການປະກອບສ່ວນເຂົ້າໃນການຮັດແໜ້ນການພົວພັນຮ່ວມມືໃນທຸກຂົງເຂດວຽກງານໃຫ້ໄດ້ຮັບການພັດທະນາ ແລະ ສືບ
ຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນຕະຫຼອດໄປ, ພ້ອມທັງເປັນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ, ສອງກອງທັບປະຊາຊົນ ລາວ-ຫວຽດນາມ ໃຫ້ໄດ້ຮັບການເສີມຂະ ຫຍາຍ ແລະ ແຕກດອກອອກຜົນກ້າວຂຶ້ນຢ່າງບໍ່ຢຸດຢັ້ງ.

ແຫຼ່ງທີ່ມາ:ອາຫວຸ້ນ
ວັນທີ 16/08/2022