ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ກອງປະຊຸມສະຫຼຸບຕີລາຄາການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ

 


     ກອງປະຊຸມສະຫຼຸບຕີລາຄາການເຄື່ອນໄຫວປະຕິບັດໜ້າທີ່ວຽກງານຄະນະກໍາມະການ ປກຊ-ປກສ ໄດ້ຈັດຂຶ້ນໃນວັນທີ 2 ກັນຍາ 2022 ນີ້, ທີ່ກະຊວງ ປ້ອງກັນປະເທດ ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງປະທານ, ຜູ້ປະຈໍາການ ຄະນະກໍາມະການ ປກຊ-ປກສ ສູນກາງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີຫົວໜ້າຫ້ອງການ ຄະນະກໍາມະການ ປກຊ-ປກສ ສູນກາງ, ແຂວງ, ນະຄອນຫຼວງ, ຄະນະນໍາກະຊວງປ້ອງກັນປະເທດ-ກະຊວງປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.ສະຫາຍ ພັນເອກ ຄໍາຜິວ ມະນິວົງ ຮອງຫົວໜ້າຫ້ອງການ ຄະນະກໍາມະການ ປກຊ-ປກສ ສູນກາງ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານ ປກຊ-ປກສ ທົ່ວປະເທດ ໃນໄລຍະທີ່ຜ່ານມາ, ພາຍໃຕ້ການຊີ້ນໍາ-ນໍາພາຂອງຄະນະກໍາມະການ ປກຊ-ປກສ ສູນກາງ, ແຂວງ, ນະຄອນຫຼວງຢ່າງໃກ້ ຊິດ, ແທດເຖິງ ແລະ ໂດຍໄດ້ຮັບ ການຮ່ວມມືຈາກອົງການຈັດຕັ້ງ, ກົມກອງທ້ອງຖິ່ນທີ່ກ່ຽວຂ້ອງ, ດ້ວຍຄວາມເອົາໃຈໃສ່ໃນການຊີ້ນໍາ-ນໍາພາຂອງຫ້ອງການຄະນະກໍາມະການ ປກຊ-ປກສ ແຕ່ລະຂັ້ນ ຈິ່ງສາມາດຍາດໄດ້ຜົນສໍາເລັດຫຼາຍດ້ານປະກອບສ່ວນສໍາຄັນໃນການຮັບປະກັນໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ ກ້າວຂຶ້ນຢ່າງບໍ່ຢຸດຢັ້ງ ຮັບປະກັນເຮັດໃຫ້ປະເທດຊາດມີຄວາມໝັ້ນຄົງ. ຈາກນັ້ນຄະນະກໍາມະການປ້ອງກັນຊາດ-ປ້ອງກັນຄວາມສະຫງົບຂັ້ນຕ່າງໆ ກໍໄດ້ ພ້ອມກັນປະ ກອບຄໍາຄິດຄໍາເຫັນແລກປ່ຽນຖອດຖອນບົດຮຽນໃນການຈັດຕັ້ງປະຕິບັດວຽກງານປ້ອງກັນຊາດ- ປ້ອງກັນຄວາມສະຫງົບໃນໄລຍະຜ່ານມາ ຢ່າງມີພາວະວິໃສ ແລະ ສອດຄອງກັບໜ້າທີ່ການເມືອງໃນໄລຍະ  ໃໝ່. ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການຊີ້ນໍາ-ນໍາພາ, ການຈັດຕັ້ງປະຕິບັດວຽກງານຫ້ອງການຄະນະກໍາມະການ ປກຊ-ປກສ ທົ່ວປະ ເທດໃນໄລຍະຜ່ານມາ ເຖິງວ່າຈະໄດ້ປະ ເຊີນໜ້າກັບສິ່ງທ້າທ້າຍ ແລະ ຄວາມຫຍຸ້ງຍາກຫຼາຍປະການ, ແຕ່ໂດຍໄດ້ຮັບການເອົາໃຈໃສ່ຊີ້ນໍາ-ນໍາພາຈາກຄະນະກໍາມະການ ປກຊ-ປກສ ຂັ້ນສູນກາງ, ແຂວງ-ນະ ຄອນຫຼວງ, ການເຄື່ອນໄຫວຈັດຕັ້ງປະຕິບັດວຽກງານຕົວຈິງຂອງຫ້ອງການຄະນະກໍາມະການ ປກຊ-ປກສ ຂັ້ນຕ່າງໆໃນຂອບເຂດທົ່ວປະເທດ ສາມາດຍາດໄດ້ໝາກຜົນທີ່ຕັ້ງໜ້າໃນຫຼາຍດ້ານ, ໄດ້ພ້ອມກັນບຸກບືນສູ້ຊົນ, ສຸມທຸກກໍາລັງແຮງ ແລະ ຍົກສູງຄວາມຮັບຜິດຊອບເຮັດສໍາເລັດໜ້າທີ່ການ ເມືອງຂອງຕົນ ທີ່ ພັກ-ລັດ ແລະ ປະຊາຊົນມອບໝາຍໃຫ້, ກໍາແໜ້ນ ແລະ ປະຕິບັດໃຫ້ຖືກຕ້ອງ, ເດັດຂາດ, ເຂັ້ມງວດຕາມພາລະບົດບາດ, ຂອບເຂດສິດ, ໜ້າທີ່, ຄວາມຮັບຜິດຊອບ ໃຫ້ມີປະສິດທິຜົນສູງ, ຍາດ ເອົາຜົນສໍາເລັດໃໝ່ໃຫຍ່ກວ່າເກົ່າ, ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານ ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃນສະພາບການໃໝ່.