ມອບ-ຮັບ ໜ້າທີ່ຫົວໜ້າການເມືອງກອງພົນທີ 5

    ພິທີ ມອບ-ຮັບ ຫົວໜ້າການເມືອງກອງພົນທີ 5 ລະຫວ່າງ ສະຫາຍ ພົນຈັດຕະວາ ສີປະເສີດ ເຜີຍຄໍາສີງ ຫົວໜ້າການເມືອງ ກອງພົນ
ທີ 5 (ຜູ້ເກົ່າ) ແລະ ສະຫາຍ ພັນເອກ ຄໍາກົດ ອີນສີນາ ຫົວໜ້າການເມືອງກອງພົນທີ 5 (ຜູ້ໃໝ່), ໄດ້ຈັດຂຶ້ນ ວັນທີ 30 ທັນວາ 2024 ນີ້,
ໂດຍການເປັນປະທານ ຂອງສະຫາຍ ພົນຕີ ວົງສອນ ອິນປານພິມ ກໍາມະການຄະນະປະຈໍາພັກ ກະຊວງປ້ອງກັນປະເທດ, ຫົວໜ້າກົມໃຫຍ່
ການເມືອງກອງທັບ, ມີກົມພະນັກງານ, ກົມຈັດຕັ້ງພັກ, ກອງບັນຊາການປ້ອງກັນຄວາມສະຫງົບແຂວງຈໍາປາສັກ, ບັນດາກົມກອງອ້ອມຂ້າງ,
ພ້ອມດ້ວຍພະນັກງານຫຼັກແຫຼ່ງທົ່ວກອງພົນທີ 5 ເຂົ້າຮ່ວມ.

     ສະຫາຍ ພົນຈັດຕະວາ ສີປະເສີດ ເຜີຍຄໍາສີງ ຫົວໜ້າການເມືອງກອງພົນທີ 5 (ຜູ້ເກົ່າ) ກໍ່ໄດ້ຜ່ານບົດສະຫຼຸບໂດຍຫຍໍ້ ໃນໄລຍະຜ່ານ
ມາ ທີ່ດຳລົງຕຳແໜ່ງ ເປັນຫົວໜ້າການເມືອງ ໄດ້ເປັນເຈົ້າການເອົາໃຈໃສ່ນໍາພາ-ຊີ້ນຳ ວຽກງານຕ່າງໆ ຕາມພາລະບົດບາດ, ໜ້າທີ່ ຂອງຕົນ
ເຊິ່ງສາມາດສ້າງໄດ້ຜົນງານຫຼາຍດ້ານ ເປັນຕົ້ນແມ່ນຮັກສາໄດ້ຄວາມສາມັກຄີ ເຮັດໃຫ້ສະພາບມີຄວາມສະຫງົບ, ພະນັກງານ-ສະມາຊິກພັກ
ມີແນວຄິດການເມືອງໜັກແໜ້ນ, ມີຄວາມຈົງຮັກພັກດີ ຕໍ່ປະເທດຊາດ, ຕໍ່ພັກ, ຕໍ່ປະຊາຊົນ ຜົນງານດັ່ງກ່າວ, ຍ້ອນມີການນໍາພາຢ່າງໃກ້ຊິດ
ຂອງອົງຄະນະພັກ ກະຊວງປ້ອງກັນປະເທດ ກໍຄືຄະນະພັກ ແຕ່ລະຂັ້ນ ເຮັດໃຫ້ກອງພົນທີ 5 ມີຜົນສໍາເລັດຢ່າງຈົບງາມຕະຫຼອດມາ. ຈາກນັ້ນ,
ໄດ້ພ້ອມກັນລົງນາມເຊັນບົດບັນທຶກ ການມອບ-ຮັບໜ້າທີ່ ລະຫວ່າງ ຫົວໜ້າການເມືອງ ກອງພົນທີ 5 ຜູ້ເກົ່າ ແລະ ຜູ້ໃໝ່ ຢ່າງເປັນທາງການ.

     ສະຫາຍ ພົນຕີ ວົງສອນ ອິນປານພິມ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ ສະຫາຍ ຫົວໜ້າການເມືອງຜູ້ເກົ່າ ສ້າງໄດ້ໃນໄລ
ຍະຜ່ານມາ ພ້ອມທັງເນັ້ນໜັກໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ສຶກສາອົມຮົບການເມືອງ-ນຳພາແນວຄິດ, ຕັ້ງໜ້າເຝິກຝົນຫຼໍ່ຫຼອມຕົນ
ເອງໃນທຸກດ້ານ, ເພີ່ມທະວີບົດບາດໃນການນຳພາ-ຊີ້ນໍາ ທຸກຂົງເຂດວຽກງານທີ່ຕົນເອງຮັບຜິດຊອບ ໃຫ້ມີຄຸນນະພາບສູງ, ຕັ້ງໜ້າປະຕິບັດ
ບັນດາຂໍ້ກໍານົດ, ກົດລະບຽບ ຂອງກອງທັບ ວາງອອກໃຫ້ເຂັ້ມງວດ ເພື່ອພ້ອມກັນເຮັດສຳເລັດໜ້າທີ່ ທີ່ການຈັດຕັ້ງຂັ້ນເທິງມອບໝາຍໃຫ້.

ແຫຼ່ງຂ່າວໂດຍ ທອງປານ ສີດາໄລ
ວັນທີ 31/12/2024