ຈີນ ຈະດຳເນີນການຂັ້ນເດັດຂາດ ຖ້າ ໃຕ້ຫວັນ ຄິດແຍກເອກະລາດ
ສຳນັກຂ່າວ AP ລາຍງານໃນວັນທີ 25 ກໍລະກົດ 2019 ວ່າ: ທາງການ ຈີນ ສົ່ງສັນຍານເດັດຂາດຕໍ່ ໃຕ້ຫວັນ ດ້ວຍການເຜີຍແຜ່ປຶ້ມປົກຂາວທີ່ເປັນນະໂຍບາຍ
ດ້ານປ້ອງກັນຊາດຂອງ ຈີນ ທີ່ໃຫ້ຄວາມສຳຄັນກັບດິນແດນ ໃຕ້ຫວັນ ໄວ້ອັນດັບຕົ້ນໆ. ພ້ອມມີຂໍ້ຄວາມວ່າຈະບໍ່ຍົກເວັ້ນການໃຊ້ກຳລັງທະຫານ ເພື່ອຈະລວມ ໃຕ້ຫວັນ
ກັບຄືນ ຈີນ ທັງຍັງຢືນວ່າ: ຈະໃຊ້ຍຸດທະວິທີທາງທະຫານທຸກທາງ ເພື່ອປາບປາມຜູ້ທີ່ພະຍາຍາມແບ່ງແຍກດິນແດນຢ່າງທີ່ເຄີຍເກີດຂຶ້ນຢູ່ ຕີເບດ ແລະ ຊິນຈຽງອຸຍກູ.
ທ່ານ ອູ໋ ສຽນ ໂຄສົກກະຊວງປ້ອງກັນປະເທດ ສປ ຈີນ ກ່າວວ່າ: ກະແສພະຍາຍາມແບ່ງແຍກດິນແດນ ໃຕ້ຫວັນ ມີສູງຂຶ້ນ ແລະ ຂໍເຕືອນກຸ່ມທີ່ພະຍາຍາມປະກາດ
ອິດສະຫຼະພາບ ໃຕ້ຫວັນ ຈະຕ້ອງພົບຈຸດຈົບ ແລະ ໃຜກໍຕາມທີ່ຄິດຈະແຍກໃຕ້ຫວັນຈາກຈີນ, ກອງທັບ ຈີນ ຈະສູ້ຢ່າງບໍ່ລົດລະ ເພື່ອທີ່ຈະປົກປ້ອງອະທິປະໄຕເພື່ອຜະນຶກ
ລວມດິນແດນຂອງປະເທດ. ນອກນັ້ນທ່ານ ອູ໋ ສຽນ ຍັງໄດ້ກ່າວໃນພິທີຖະແຫຼງການທີ່ນະຄອນຫຼວງ ປັກກິ່ງ ເມື່ອວັນທີ 24 ກໍລະກົດ 2019 ວ່າ: ໃຕ້ຫວັນເປັນດິນແດນ
ທີ່ປົກຄອງດ້ວຍລະບອບປະຊາທິປະໄຕ ນັບຈາກແຍກໂຕຈາກ ຈີນ ຊ່ວງສົງຄາມກາງເມືອງທີ່ພັກຄອມມູນິດ ໄດ້ຮັບໄຊຊະນະໃນແຜ່ນດິນໃຫຍ່ ເມື່ອປີ 1949 ແຕ່ ຈີນ
ປະກາດມາໂດຍຕະຫຼອດວ່າ ໃຕ້ຫວັນ ເປັນສ່ວນໜຶ່ງຂອງ ຈີນ.
ຄວາມຂັດແຍ່ງຫຼ້າສຸດຕືງຄຽດຂຶ້ນຈາກທີ່ກໍລະນີທີ່ ອາເມຣິກາ ອະນຸມັດການຂາຍອາວຸດໃຫ້ໃຕ້ຫວັນ ມີມູນຄ່າ 2.200 ລ້ານໂດລາ ລວມເຖິງເປີດບ້ານໃຫ້ ນາງສາວ
ໄຊ່ ອິງເຫວິນ ຜູ້ນຳໃຕ້ຫວັນ ເດີນທາງຢ້ຽມຢາມນະຄອນ ນິວຢອກ ກ່ອນເດີນທາງໄປຢ້ຽມຢາມພັນທະມິດໃນແຖບທະເລ ແຄຣິບຽນ. ເຊິ່ງປຶ້ມປົກຂາວສະບັບຫຼ້າສຸດຂອງ
ຈີນ ຍັງລະບຸເຖິງການທີ່ ອາເມຣິກາ ແລະ ອົສະຕຣາລີ ເສີມກຳລັງ ແລະ ຮັດແໜ້ນສຳພັນທະມິດໃນແຖບ ອາຊີ-ປາຊີຟິກ ວ່ານຳຄວາມບໍ່ສະຫງົບມາສູ່ພູມິພາກ ລວມເຖິງ
ການຕິດຕັ້ງລະບົບປ້ອງກັນຂີປະນາວຸດໃຫ້ ເກົາຫຼີໃຕ້.