ຢູເອັນ ເຕືອນ ໂລກກຳລັງປະເຊີນກັບວິກິດການອຶດຫິວ ເພີ່ມຂຶ້ນ
ວັນທີ 23 ມີນາ ອົງການມະນຸດສະທຳຂອງສະຫະປະຊາຊາດ (UN) ໄດ້ເຕືອນວ່າ, ຈຳນວນປະຊາກອນທົ່ວໂລກທີ່ປະເຊີນກັບ
ຄວາມອຶດຫິວຢ່າງຮຸນແຮງ ອາດຈະເພີ່ມຂຶ້ນອີກຫຼາຍສິບລ້ານຄົນ ທ່າມກາງຄວາມພະຍາຍາມຮຽກຮ້ອງໃຫ້ມີການແກ້ໄຂທາງການທູດ
ຕໍ່ສະຖານະການໃນຕາເວັນອອກກາງ.
ໂຄງການອາຫານໂລກ (WFP) ຄາດຄະເນວ່າ: ຈຳນວນປະຊາກອນທີ່ປະເຊີນກັບການຂາດແຄນອາຫານຢ່າງຮຸນແຮງໃນທົ່ວໂລກ
ອາດຈະບັນລຸລະດັບສູງສຸດແບບບໍ່ເຄີຍມີມາກ່ອນໃນ ປີ 2026, ຖ້າຫາກຂໍ້ຂັດແຍ່ງໃນຕາເວັນອອກກາງຍັງສືບຕໍ່ເພີ່ມຂຶ້ນ ແລະ ສົ່ງຜົນ
ກະທົບຕໍ່ສະຖຽນລະພາບທາງເສດຖະກິດທົ່ວໂລກ. ທ່ານ ຟາຮານ ຮັກ ຮອງໂຄສົກເລຂາທິການໃຫຍ່ UN ກ່າວວ່າ: ການວິເຄາະຫຼ້າ
ສຸດຂອງ WFP ຄາດຄະເນ ວ່າ, ຈະມີປະຊາກອນເກືອບ 45 ລ້ານຄົນ ທີ່ອາດຈະຕົກຢູ່ໃນສະພາບບໍ່ໝັ້ນຄົງດ້ານອາຫານຂັ້ນຮຸນແຮງຖ້າ
ຫາກຂໍ້ຂັດແຍ່ງບໍ່ສິ້ນສຸດລົງພາຍໃນກາງປີ ແລະ ລາຄານ້ຳມັນຍັງຄົງສູງກວ່າ 100 ໂດລາຕໍ່ຖັງ. ອົງການມະນຸດສະທຳຍັງໄດ້ເຕືອນວ່າ: ການ
ປິດລ້ອມຊ່ອງແຄບຮໍມູດ ຈະບໍ່ພຽງແຕ່ສົ່ງຜົນກະທົບຕໍ່ການຂົນສົ່ງນ້ຳມັນເທົ່ານັ້ນ, ແຕ່ຍັງສົ່ງຜົນກະທົບຕໍ່ການຂົນສົ່ງປຸ໋ຍ ຊຶ່ງເປັນປັດໄຈທີ່
ສຳຄັນຂອງການຜະລິດອາຫານອີກດ້ວຍ. ຫ້ອງການປະສານງານດ້ານມະນຸດສະທຳຂອງສະຫະປະຊາຊາດ (OCHA) ລະບຸວ່າ: UN ແລະ
ຄູ່ຮ່ວມງານຍັງສືບຕໍ່ເພີ່ມການຊ່ວຍເຫຼືອດ້ານມະນຸດສະທຳ ລວມທັງອາຫານ, ທີ່ພັກອາໄສ, ນ້ຳສະອາດ ແລະ ການບໍລິການທາງການແພດ
ໃຫ້ແກ່ຄອບຄົວທີ່ຕ້ອງອົບພະຍົບ. ໃນປະເທດລີບັງ, ອົງການສະຫະປະຊາຊາດ ລວມມີໂຄງການອາຫານໂລກ (WFP), ສຳນັກງານຂ້າ
ຫຼວງໃຫຍ່ສະຫະປະຊາຊາດເພື່ອຊາວອົບພະຍົບ (UNHCR) ແລະ ກອງທຶນເດັກສະຫະປະຊາຊາດ (UNICEF), ພ້ອມກັບຄູ່ຮ່ວມງານ
ໄດ້ແຈກຢາຍອາຫານປຸງແຕ່ງແລ້ວຫຼາຍກວ່າ 1.1 ລ້ານຊຸດ, ລວມທັງເຄື່ອງໃຊ້ທີ່ຈຳເປັນຫຼາຍສິບພັນຊຸດ ແລະ ເຄື່ອງນອນໃຫ້ແກ່ທີ່ພັກອາໄສ
ຊຸມຊົນ, ພ້ອມທັງຈັດສົ່ງນ້ຳສະອາດຫຼາຍແສນລິດ. OCHA ລາຍງານວ່າ: ປັດຈຸບັນ, ມີປະຊາຊົນຫຼາຍກວ່າ 1 ລ້ານຄົນໄດ້ລົງທະບຽນເປັນ
ຜູ້ອົບພະຍົບແລ້ວ ຊຶ່ງໃນຈຳນວນນີ້ເກືອບ 300.000 ຄົນ ເປັນເດັກນ້ອຍ, ໂດຍມີພຽງສ່ວນໜ້ອຍເທົ່ານັ້ນທີ່ອາໄສຢູ່ໃນທີ່ພັກອາໄສຂອງລັດ.
ໃນປະເທດອີຣ່ານ, ພະນັກງານສາທາລະນະສຸກ ແລະ ສະຖານທີ່ປິ່ນປົວທາງການແພດຍັງສືບຕໍ່ໄດ້ຮັບຜົນກະທົບ, ໂດຍມີລາຍງານວ່າ
ມີພະນັກງານສາທາລະນະສຸກເສຍຊີວິດ 17 ຄົນ, ໄດ້ຮັບບາດເຈັບຫຼາຍກວ່າ 100 ຄົນ ແລະ ສະຖານທີ່ປິ່ນປົວທາງການແພດຫຼາຍກວ່າ 240
ແຫ່ງໄດ້ຮັບຄວາມເສຍຫາຍ. ນອກຈາກນັ້ນ, ເຮືອນຫຼາຍສິບພັນຫຼັງ ແລະ ສະຖານທີ່ກໍ່ສ້າງພື້ນຖານໂຄງລ່າງດ້ານນ້ຳອີກຫຼາຍຮ້ອຍແຫ່ງໄດ້ຮັບ
ຄວາມເສຍຫາຍ.
ແຫຼ່ງທີ່ມາ: ຂກທ
ວັນທີ 24/03/2026