ບໍລິສຸດຕໍ່ຊາດ ຮັບໃຊ້ປະຊາຊົນຢ່າງສຸດໃຈ ເສີມຂະຫຍາຍທາດແທ້ມູນເຊື້ອປະຕິວັດ ສໍາເລັດທຸກຫນ້າທີ່

ວາງສີລາລຶກໂຄງການກໍ່ສ້າງສຳນັກງານ ແລະ ເຮືອນຮັບແຂກສະຫະພັນນັກຮົບເກົ່າແຫ່ງຊາດລາວ

     ພິທີວາງສີລາລຶກໂຄງການກໍ່ສ້າງສຳນັກງານ ແລະ ເຮືອນຮັບແຂກສະຫະພັນນັກຮົບເກົ່າແຫ່ງຊາດລາວໄດ້ຈັດຂຶ້ນໃນວັນທີ 13 ພຶດສະພາ 2017 ນີ້,
ໂດຍການເຂົ້າຮ່ວມຂອງ ທ່ານ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວ ແລະ ທ່ານ ນາງ ຄຳຈັນ ພິມແສງສະຫວັນ
ຮອງປະທານສູນກາງແນວລາວສ້າງຊາດ ມີບັນດາຄະນະນຳ ແລະ ພະນັກງານທັງສອງພາກສ່ວນ, ອຳນາດການປົກຄອງບ້ານອ້ອມຂ້າງເຂົ້າຮ່ວມ.


ພົນຈັດຕະວາ ສົມພອນ ແກ້ວມີໄຊ ເຂົ້າຮ່ວມພິທີວາງສີລາລຶກໂຄງການກໍ່ສ້າງສຳນັກງານ
ແລະ ເຮືອນຮັບແຂກສະຫະພັນນັກຮົບເກົ່າແຫ່ງຊາດລາວ

     ທ່ານ ນາງ ບຸນຮຽງ ວິໄລສຸກ ຮອງປະທານບໍລິສັດ ວົງວິໄຊ ກໍ່ສ້າງເຄຫາສະຖານ ແລະ ຂົວທາງຈຳກັດ ໃນນາມຜູ້ຮັບເໝົາກໍ່ສ້າງໄດ້ໃຫ້ຮູ້ວ່າ: ໂຄງການ
ກໍ່ສ້າງສຳນັກງານ ແລະ ເຮືອນຮັບແຂກສະຫະພັນນັກຮົບເກົ່າແຫ່ງຊາດລາວ ແມ່ນເລີ່ມເກັບກຳຂໍ້ມູນຂຽນບົດສະເໜີໂຄງການ, ສຳຫຼວດອອກແບບໃນການ
ກໍ່ສ້າງເລີ່ມມາແຕ່ເດືອນທັນວາ 2016 ເປັນຕົ້ນມາ, ໂດຍການກໍ່ສ້າງແມ່ນທຶນຂອງບໍລິສັດອອກກ່ອນຮ້ອຍສ່ວນຮ້ອຍ, ສຳນັກງານດັ່ງກ່າວເປັນອາຄານ 5
ຊັ້ນ ກໍ່ສ້າງດ້ວຍເບຕົງເສີມເຫຼັກ ຂະໜາດ 84x27,5 ແມັດ, ເຮືອນຮັບແຂກເປັນຕຶກ 3 ຊັ້ນກໍ່ສ້າງດ້ວຍເບຕົງເສີມເຫຼັກ ຂະຫນາດ 80x16,2 ແມັດ, ມີ
ລະບົບກຳແພງອ້ອມຮອບ, ເດີ່ນຈອດລົດ, ປະຕູໂຂງ ແລະ ປ້ອມຍາມ, ມີລະບົບນ້ຳປະປາ, ໄຟຟ້າ, ມີລະບົບເຄື່ອງປັບອາກາດລວມມູນຄ່າ
173.290.587.547 ກີບ ແລະ ການດຳເນີນການກໍ່ສ້າງເປັນເວລາ 4 ປີ ຈຶ່ງຈະສຳເລັດ.